စစ်ကောင်စီအား ထိုးစစ်ဆင်တိုက်ခိုက်မှုများရပ်ဆိုင်းရန် တရုတ်သံသမန်များ၏ ပြောကြားမှုကို လက်မခံသောကြောင့် ကချင်တော်လှန်ရေးတပ်ဖွဲ့ KIO/KIA အဖွဲ့ထိန်းချုပ်ထားသည့် တရုတ်နယ်စပ်ဂိတ်များအားလုံးကို တရုတ်အစိုးရက ယနေ့(အောက်တိုဘာ ၁၉) မှ စတင်ပိတ်လိုက်ကြောင်း သတင်းရရှိသည်။

ကရင်ပြည်နယ် မြဝတီတောင်ခြမ်းက စွယ်တော်စခန်းအား စစ်ကောင်စီအောက်ခြေတပ်ဖွဲ့နှင့် ညှိယူ၍ ကရင်အမျိုးသားတပ်မတော် KNLA တပ်ဖွဲ့ သိမ်းပိုက်ခဲ့ဟု စစ်ကောင်စီလော်ဘီများက တယ်လီဂရမ်ပေါ်မှ ရေးသားထားသည်။

ရေးမြို့နယ် စံပြကျေးရွာအနီး ယခုရက်ပိုင်းက တိုက်ပွဲအတွင်း စစ်ကောင်စီတပ်နှင့် တော်လှန်ပူးပေါင်းတပ်ဖွဲ့များ အကြား နှစ်ဖက်ထိခိုက်သေဆုံးမှုရှိကြောင်း သတင်းရရှိသည်။

မွန်ပြည်နယ် ရေပိုင်နက်အတွင်းက ကျားဖောင်လုပ်သားများ ကျန်းမာရေးစောင့်ရှောက်မှု အပြည့်အဝမရရှိသဖြင့် မလိုလားအပ်သည့် အသက်ဆုံးရှုံးမှုအချို့ရှိလာနိုင်သဖြင့် သက်ဆိုင်ရာက ကြပ်မတ်ပေးရန်လိုအပ်နေကြောင်း သိရသည်။

အရေးပေါ်ကယ်ဆယ်ရေးနှင့် နယ်စပ်ဖြတ်ကျော်ဒုစရိုက်သမားများ နှိမ်နင်းတားဆီးရေးအတွက် “Strike-2024” အမည်ရှိ တရုတ်နှင့် ထိုင်းစစ်တပ်တို့၏ ပူးတွဲစစ်ရေးလေ့ကျင့်မှုကို ယူနန်ပြည်နယ် ကူမင်းနယ်စပ်တွင် ၁၁ ရက်ကြာ ပြုလုပ်လျက်ရှိကြောင်း South China Morning Post သတင်းစာက ရေးသားသည်။

သီတင်းကျွတ်လပြည်နေ့တွင် ကျိုက်ခမီရေလယ်ဘုရား၌ ဘုရားဖူးများဖြင့် အထူး စည်ကားနေကြောင်း တွေ့ရသည်။

ပြီးခဲ့သည့် အောက်တိုဘာ (၅) ရက်နေ့က မွန်ပြည်သစ်ပါတီ တပ်ရင်း (၅) မှ NMSP(AD) ထံ သွားရောက်ပူးပေါင်းသူများအား မွန်ပြည်သစ်ပါတီဗဟိုက ကြေညာချက်ထုတ်၍ ပြန်ခေါ်လိုက်ကြောင်း တွေ့ရသည်။

စစ်ကောင်စီဒုကာချုပ်၏ညွှန်ကြားမှုဖြင့် ထိုင်းကုန်စည်များအား ဈေးကွက်များအထိ ဖမ်းဆီးနေမှုကြောင့် မြန်မာနိုင်ငံတောင်းပိုင်းတွင် အဓိကအသုံးပြုနေရသော ထိုင်းကုန်ပစ္စည်းများ စတင်ပြတ်လပ်လာကြောင်း သိရသည်။

တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် NCA (၉)နှစ်မြောက် နှစ်ပတ်လည်နေ့အခမ်းအနားကို ယမန်နေ့နံနက်ပိုင်းတွင် နေပြည်တော်ရှိ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုဗဟိုဌာန၌ ကျင်းပခဲ့ရာ မွန်ပြည်သစ်ပါတီ NMSP မှ ကိုယ်စားလှယ်အဆင့်လျှော့ချပြီး တက်ရောက်လာခဲ့ကြောင်း တွေ့ရှိရသည်။

စစ်ကောင်စီ ရေကြောင်းလုံခြုံရေးတပ်ဖွဲ့က ကပ္ပလီပင်လယ်ပြင်မြောက်ပိုင်းရေပြင်၌ ပင်လယ်ပြင်လေ့ကျင့်ခန်းအား လာမည့်အောက်တိုဘာ (၂၀) ရက်မှ (၂၄)ရက်အထိပြုလုပ်မည်ဖြစ်ကြောင်း ဆိုသည်။