တနင်္သာရီတိုင်း သရက်ချောင်းမြို့နယ်အတွင်း KNLA စစ်ဆေးရေးဂိတ်မှ ပစ်ခတ်ခံရသည့် မွေးကင်းစကလေးနှင့် ဖခင်ဖြစ်သူ သေဆုံးမှုနှင့်ပတ်သက်၍ KNU တပ်မဟာ (၄) မှ တာဝန်ရှိသူများအား အရေးယူသွားမည်ဟု ဒုတိယဗိုလ်မှူးကြီး စောဒါးဒါးက ပြောကြားလိုက်သည်။
ဖေဖော်ဝါရီ ၂၃ ရက် ညပိုင်းက သရက်ချောင်းမြို့နယ်၊ ပိတောက်ကြီးကျေးရွာမှ ပလောက်မြို့ဆေးရုံသို့ မွေးကင်းစကလေးနှင့် မိသားစုဝင် ၃ ဦး ဆိုင်ကယ်ဖြင့်သွားစဉ် KNLA တပ်ရင်း (၁၂) ၏ ဆင်ထိုးကြီးကျေးရွာဂိတ်တွင် ပစ်ခတ်ခံခဲ့ရခြင်းဖြစ်သည်။ ဖခင်ဖြစ်သူ မောင်ဂန် (၃၇ နှစ်) နှင့် ရက် ၂၀ သာရှိသေးသည့် ကလေးငယ် သေဆုံးခဲ့ပြီး မိခင်ဖြစ်သူမှာ ဒဏ်ရာရရှိခဲ့သည်။
KNLA တပ်ရင်းမှူး မုတ်ဆိတ် (ခ) ဖိုးခွား အပါအဝင် တပ်ဖွဲ့ဝင် ၈ ဦးအား ပစ်ခတ်မှုတွင် ပါဝင်သည်ဟု စုံစမ်းတွေ့ရှိပြီး ၎င်းတို့အား တပ်မဟာသို့ အပ်နှင်းကာ စည်းကမ်းဖောက်ဖျက်မှုအတွက် အရေးယူသွားမည်ဖြစ်ကြောင်း ဒုတိယဗိုလ်မှူးကြီးက သတင်းမီဒီယာများအား ရှင်းလင်းခဲ့သည်။ ဖြစ်စဉ်မှာ “လူသတ်မှုအဆင့် ပြစ်မှုကျူးလွန်ခြင်း” ဖြစ်ကြောင်း၊ တာဝန်ရှိသူများအား ဥပဒေနှင့်အညီ အပြည့်အဝ အရေးယူမည်ဟု ၎င်းက ထပ်လောင်းအတည်ပြုခဲ့သည်။
ဒေသခံများအဆိုအရ ဂိတ်ဖြတ်သန်းစဉ် ဆိုင်ကယ်အရှိန်လွန်၍ ဂိတ်ကျော်သွားပြီးမှ ရပ်လိုက်ရာတွင် KNLA တပ်သားများက ပစ်ခတ်ခဲ့ခြင်းဖြစ်ကြောင်း သိရသည်။ ဖြစ်စဉ်နှင့်ပတ်သက်၍ KNU ၏ လျင်မြန်သော တုံ့ပြန်မှုကို ဒေသခံများက မျှော်လင့်နေကြောင်း သတင်းရင်းမြစ်များက ဖော်ပြသည်။
