စစ်ကောင်စီသည် အကျဉ်းထောင်များအတွင်းရှိ ရာဇဝတ်အကျဉ်းသားများကို လက်နက်တပ်ဆင်ကာ အတင်းအဓမ္မ စစ်မှုထမ်းခိုင်းနေကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က ယမန်နေ့(မတ်လ ၁၄ ရက်)တွင် သတင်းထုတ်ပြန်၍ ကန့်ကွက်လိုက်သည်။
PPNM ၏ ပြောရေးဆိုခွင့်ရှိသူ ကိုသိုက်ထွန်းဦးက “အကျဉ်းသားတွေကို သူတို့ရဲ့ ဆန္ဒမပါဘဲ စစ်တိုက်ခိုင်းတာဟာ သူတို့ကို သေမင်းထံ ပို့လိုက်တာနဲ့ အတူတူပါပဲ။ လက်နက်တွေကိုင်ပြီး တိုက်ခိုက်ရတဲ့အခါ သူတို့အသက်ဆုံးရှုံးနိုင်ခြေက ပိုများလာတယ်။ ဒါဟာ လူ့အခွင့်အရေးကို အကြီးမားဆုံး ချိုးဖောက်တဲ့ လုပ်ရပ်ဖြစ်ပြီး၊ အကျဉ်းထောင်တွေထဲမှာ ဒီလို တရားဥပဒေကို လုံးဝမထီမဲ့မြင်ပြုတဲ့ လုပ်ရပ်တွေ ပိုပိုပြီး တွေ့လာရပါတယ်” ဟု ဝေဖန်ခဲ့သည်။
အထူးသဖြင့် ကချင်ပြည်နယ်၊ မိုးညှင်းအကျဉ်းထောင်တွင် ရာဇဝတ်သားများအား လုံခြုံရေးတာဝန်ယူစေပြီး၊ ဗန်းမော်ထောင်ကို တော်လှန်ရေးတပ်များ တိုက်ခိုက်သည့်အခါ အကျဉ်းသားများကို လက်နက်များပေးကာ ခုခံစေခဲ့ကြောင်း အတည်ပြုထားသည့် အချက်အလက်များကို PPNM က ထောက်ပြခဲ့သည်။
ထို့အပြင်၊ စစ်ကောင်စီသည် အကျဉ်းသားများအား အင်အားဖြည့်တင်းရန် ဖမ်းဆီးထားသူများကို ပြစ်ဒဏ်လွတ်ငြိမ်းခွင့်ပေးကာ တရားမဝင် စစ်မှုထမ်းခိုင်းသည့် လုပ်ရပ်များကို ပွင့်ပွင့်လင်းလင်း ဆက်လက်ကျူးလွန်နေသည်ဟု ၎င်းတို့က ရှုတ်ချခဲ့သည်။
အဆိုပါသတင်းထုတ်ပြန်ချက်နှင့်အတူ၊ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ မတ်လ ၁၄ ရက်အထိ စာရင်းများအရ၊ နိုင်ငံတဝန်းတွင် နိုင်ငံရေးနှင့်ဆက်စပ်ပြီး ဖမ်းဆီးခံထားရသူ ၂၈,၈၄၆ ဦးရှိပြီး၊ ယင်းအနက် ၁၀,၆၂၇ ဦးသည် ထောင်ဒဏ်ချမှတ်ခံထားရကြောင်း ဖော်ပြထားသည်။
PPNM သည် စစ်ကောင်စီ၏ ဤလုပ်ရပ်များကို အပြည်ပြည်ဆိုင်ရာ အသိုင်းအဝိုင်းက ချက်ချင်း ဝင်ရောက်ဟန့်တားရန် ပြင်းပြင်းထန်ထန် တောင်းဆိုလိုက်သည်။
