စင်ကာပူနိုင်ငံသား မြန်မာအမျိုးသမီး ဒေါ်ဇင်နွယ်ညွန့် (၅၈ နှစ်) သည် အွန်လိုင်းငွေလိမ်လုပ်ငန်း (ကျားဖြန့်) နှင့် ဆက်စပ်သည့် ငွေကြေးလွှဲပြောင်းမှုများအတွက် ကိုယ်ပိုင်ဘဏ်အကောင့် ၃ ခုကို ကော်မရှင်ယူ၍ ခွင့်ပြုခဲ့သည့်အတွက် ပြစ်မှုထင်ရှားကြောင်း တရားရုံးက ယမန်နေ့ (မတ်လ ၅ ရက်) တွင် ဆုံးဖြတ်ခဲ့သည်။

သူမနှင့်အတူ ပူးပေါင်းခဲ့သူ ဦးဉာဏ်ဝင်း (စင်ကာပူတွင် အမြဲနေထိုင်ခွင့်ရသူ) ကိုလည်း အလားတူပြစ်ဒဏ်ချမှတ်ထားပြီး ဧပြီလတွင် စီရင်ချက်ချမှတ်မည်ဖြစ်သည်။

၂၀၂၀ မှ ၂၀၂၁ အတွင်း ဒေါ်ဇင်နွယ်ညွန့်၏ ဘဏ်အကောင့်များမှ တစ်ဆင့် စင်ကာပူဒေါ်လာ ၇၁၁ သန်း (အမေရိကန်ဒေါ်လာ ၅၂၀ သန်းခန့်) လွှဲပြောင်းခဲ့ကြောင်း၊ Unione အမည်ရှိ လက္ကားကုမ္ပဏီနှင့် ပူးပေါင်း၍ ငွေကြေးလွှဲပြောင်းမှုများ လုပ်ဆောင်ခဲ့ပြီး ကော်မရှင်အဖြစ် ဒေါ်လာ ၁၇,၀၀၀ (ဒေါ်ဇင်) နှင့် ဒေါ်လာ ၁၁၀,၀၀၀ (ဦးဉာဏ်ဝင်း) ရရှိခဲ့ကြောင်း၊ တရားရုံးတွင် ဒေါ်ဇင်နွယ်ညွန့်က “ငွေများ၏မူလအရင်းအမြစ်ကို မသိ” ဟု ထွက်ဆိုခဲ့သော်လည်း လိုင်စင်မရှိဘဲ ငွေကြေးဝန်ဆောင်မှုလုပ်ငန်းလုပ်ကိုင်ခြင်းအတွက် ပြစ်မှုဖြစ်ကြောင်း အတည်ပြုခံရသည်။

၂၀၂၁ ခုနှစ်က ဩစတြေးလျနိုင်ငံသား တစ်ဦး ကျားဖြန့်လုပ်ငန်းသားများထံ အမေရိကန်ဒေါ်လာ ၁.၈ သန်း လိမ်လှေကားခံရပြီးနောက် စင်ကာပူအာဏာပိုင်များက စုံစမ်းမှုစတင်ခဲ့သည်။

ထိုသို့ စစ်ဆေးရာတွင် Unione မှ ငွေများကို ဘဏ်အကောင့်များခွဲ၍ လွှဲပြောင်းကာ သံသယဖြစ်ဖွယ်ငွေကြေး အမြောက်အမြား လှုပ်ရှားမှုများကို ဖော်ထုတ်ခဲ့သည်။

ဒေါ်ဇင်နွယ်ညွန့်နှင့် ဦးဉာဏ်ဝင်းတို့သည် စင်ကာပူငွေကြေးလိုင်စင်မရှိဘဲ ၂၀၁၉ ခုနှစ်ကတည်းက ဤလုပ်ငန်းကို စတင်ခဲ့ကြောင်း တရားရုံးစစ်ချက်တွင် ဖော်ပြထားသည်။

စင်ကာပူငွေကြေးအာဏာပိုင်အဖွဲ့ (MAS) ၏ စည်းမျဉ်းချိုးဖောက်မှုဖြင့် ဒေါ်ဇင်နွယ်ညွန့်အား ဧပြီ ၁ ရက်တွင် စီရင်ချက်ချမှတ်မည်ဖြစ်ပြီး ဦးဉာဏ်ဝင်းမှာ ဧပြီ ၂၄ ရက်တွင် ကြားနာခံရမည်။

ဤအမှုသည် နိုင်ငံတကာငွေကြေးလိမ်လုပ်ငန်းများနှင့် ချိတ်ဆက်နေသည့် စနစ်တကျစီမံထားသော ရာဇဝတ်ကွန်ရက်တစ်ခုအဖြစ် စင်ကာပူတရားရုံးက မှတ်ချက်ပြုထားသည်။