ဘုရားသုံးဆူမြို့သို့ ယူဆောင်သွားမည့် ဘတ်ငွေ ၂ ဒဿမ ၉ သန်းကို စံခလပူရီ လုံခြုံရေးတပ်ဖွဲ့ဝင်များ ဖမ်းဆည်းရမိ

စံခလပူရီ- ၂၀၂၅ ဇန် (၃၁)

မြန်မာနိုင်ငံ ဘုရားသုံးဆူမြို့သို့ ယူဆောင်သွားမည့် ဘတ်ငွေ ၂ ဒဿမ ၉ သန်းနှင့်ပတ်သက်၍ အမျိုးသမီးတစ်ဦးအပါအဝင် လူတစ်စုကို ယမန်နေ့က ဖမ်းဆီးထားကြောင်း ကန်ချနပူရီဒေသသတင်းက ဖော်ပြသည်။

၄င်းငွေများကို ဆက်သွယ်ရေးပစ္စည်းများနှင့်အတူ မြန်မာအမျိုးသမီးတစ်ဦးကိုလည်း ဖမ်းဆီးထားကြောင်း သိရသည်။

ဒေသအမှတ် ၇ ရဲတပ်ဖွဲ့မှူး Pol. Lt. Gen. Naiwat Phaddemchit က “ဆန်ခလပူရီနယ်စပ်မှာ ငွေကြေး ၂.၉ သန်း သိမ်းဆည်းရရှိခဲ့ပြီး အဲဒီငွေတွေဟာ တရားမဝင်လုပ်ငန်းတွေနဲ့ ဆက်စပ်နေတယ်လို့ ယူဆရပါတယ်။ ကော်မတီတစ်ရပ်ဖွဲ့စည်းပြီးတော့ စုံစမ်းစစ်ဆေးမှုတွေကို ဆက်လက်ဆောင်ရွက်သွားမှာပါ” ဟု ပြောသည်။

၄င်းသည် ဒေသခံအာဏာပိုင်များ၊ စစ်ဘက်ဆိုင်ရာတပ်မှူးများနှင့် တွေ့ဆုံပြီး ထောင်ဖာဖွန်ရဲစခန်းသို့ သွားရောက်ကာ တရားမဝင်လုပ်ငန်းများနှင့် ငွေကြေးလုပ်ငန်းများကို စုံစမ်းစစ်ဆေးရန် ညွှန်ကြားခဲ့သည်။

ထို့ပြင် အမှတ် ၇ ဒေသရဲတပ်ဖွဲ့မှူး ဦးစီး၍ ကန်ချန်ပူရီပြည်နယ် အုပ်ချုပ်ရေးမှူး၊ ထိုင်းစစ်တပ်တာဝန်ရှိသူများ၊ ကန်ချန်ပူရီပြည်နယ် ရဲတပ်ဖွဲ့မှူး၊ ထောင်ဖာဖွန်ခရိုင် အုပ်ချုပ်ရေးမှူး၊ ထောင်ဖာဖွန်ရဲစခန်းမှ တာဝန်ရှိပုဂ္ဂိုလ်များနှင့် အစည်းအဝေးတရပ်ပြုလုပ်ကာ နယ်စပ်ဒေသရှိ တရားမဝင်လုပ်ငန်းများကို ကာကွယ်နှိမ်နင်းရန် ဆက်လက်ညွှန်ကြားခဲ့သည်။

ကျားဖြန့်အွန်လိုင်းငွေလိမ်လည်ဂိုဏ်း Call Center များ တိုက်ဖျက်ရန်နှင့် လူကုန်ကူးခံထားရသော တရုတ်နိုင်ငံသားများကို ကယ်တင်နိုင်ရေး ပူးပေါင်းဆောင်ရွက်ရန် တရုတ်နိုင်ငံ၊ ပြည်သူ့လုံခြုံရေးဌာန ဒုဝန်ကြီး Liu Zhongyi က ထိုင်းအာဏာပိုင်များနှင့် ဘန်ကောက်တွင်ဆွေးနွေးခဲ့ပြီးနောက် ဘုရားသုံးဆူဒေသ အဝင်အထွက်လမ်းကြောင်းများကို ထိုင်းအာဏာပိုင်များက ပိုက်စိတ်တိုက်ရှာဖွေစစ်ဆေးမှုများ ပိုမိုပြုလုပ်လာကြောင်း တွေ့ရသည်။