🇲🇲🇹🇭ဘုရားသုံးဆူနယ်စပ်ဂိတ် အဆင့်မြှင့်တင်ရန် ထိုင်းအစိုးရပြင်ဆင်နေ

ထိုင်း-မြန်မာ ဘုရားသုံးဆူနယ်စပ်ဂိတ်ကို အဆင့်မြှင့်တင်ရန် ထိုင်းအစိုးရဘက်က ပြင်ဆင်နေကြောင်း ထိုင်းဘာသာဖြင့် ဖော်ပြသော ကန်ချနပူရီဒေသတွင်း သတင်းမှသိရသည်။

ထိုင်းအမျိုးသားလုံခြုံရေးကောင်စီ (NSC) ၏ ညွှန်ကြားချက်အရ ကန်ချနပူရီပြည်နယ် ဒုတိယအုပ်ချုပ်ရေးမှူး Mr. Wutthipong Suphakhawanich နှင့် တာဝန်ရှိပုဂ္ဂိုလ်များက ပြီးခဲ့သည့် ဇူလိုင်လ ၂၅ ရက်နေ့တွင် ဘုရားသုံးဆူစစ်ဆေးရေးဂိတ်၊ ခေါင်ကလုံလမ်းဆုံ၊ ကျေးရွာဧရိယာ အဓိက ၃ နေရာသို့ လာရောက်ကြည့်ရှုစစ်ဆေးခဲ့ပြီး အမြဲတမ်းစစ်ဆေးရေးဂိတ်အဖြစ် အဆင့်မြှင့်တင်သွားရန် စဉ်းစားထားကြောင်း သိရသည်။

အဆိုပါ ဘုရားသုံးဆူနယ်စပ်ဂိတ်ကို ပြီးခဲ့သည့် မေလအတွင်းက လက်ရှိထိုင်းဝန်ကြီးချုပ်ကိုယ်တိုင် လာရောက်ကြည့်ရှုခဲ့ပြီးနောက် လိုအပ်သော အချက်အလက်များ စုဆောင်းစစ်ဆေးရန် ယခုအခါ လာရောက်သည့် အဆင့်မြင့်အာဏာပိုင်အဖွဲ့အစည်း ဖြစ်သည်။

ဘုရားသုံးဆူတောင်ကြားလမ်းသည် သံဖြူဇရပ်မြို့နှင့် မိုင် ၆၀ ဝန်းကျင်သာ ဝေးကွာ၍ ဂျပန်ခေတ်က ထိုင်း-မြန်မာ မီးရထားလမ်းဖောက်လုပ်ခဲ့ပြီး အိမ်နီးချင်းနှစ်နိုင်ငံကို ဆက်သွယ်ထားသည့်လမ်းကြောင်း ဖြစ်သည်။

Photo & Ref; ข่าวเด่นภูมิภาคทั่วไทย กาญจนบุรี