💥သထုံမြို့နယ်အတွင်း တံတားငယ်တစ်စင်း မိုင်းထောင်ဖောက်ခွဲခံရပြန်သဖြင့် ခရီးသွားများ အခက်အခဲဖြစ်ပေါ်

သထုံမြို့နယ်၊ ဒုံဝန်းကျေးရွာအုပ်စု၊ ကမာစိုင်ကွက်သစ်ကျေးရွာအနီး ရန်ကုန် – မော်လမြိုင်ကားလမ်းမပေါ်ရှိ တံတားငယ်တစ်စင်းမှာ ယနေ့ ဩဂုတ်လ (၂) ရက်နေ့ နံနက်အစောပိုင်းအချိန်က မိုင်းထောင်ဖောက်ခွဲဖျက်ဆီးခံရပြန်သဖြင့် ခရီးသွားများ အခက်အခဲဖြစ်ပေါ်သွားရကြောင်း သိရသည်။

ရန်ကုန် – မော်လမြိုင် ကားလမ်းမ မိုင်တိုင်အမှတ် (၁၃၃/၆) နှင့် (၁၃၃/၇) ကြားရှိ အဆိုပါတံတားငယ်မှာ မိုင်းထောင်ဖောက်ခွဲဖျက်ဆီးခံပြီး တံတားတစ်စင်းလုံးပျက်စီးသွားကြောင်း ဒေသခံတစ်ဦးက ပြောကြားသည်။

“သန်းခေါင်ကျော်အချိန်မှာ ပေါက်ကွဲသံကြားရတာပါ။ မနက်မှ ကမာစိုင်ကွက်သစ်အနီးက တံတားငယ်တစ်စင်း မိုင်းခွဲဖျက်ဆီးခံရတာလို့ သိရပါတယ်။ တံတားက အရင်တစ်ခါဖောက်ခွဲဖျက်ဆီးခံခဲ့ရတဲ့ တံတားအရွယ်အစားလောက်ဘဲ ရှိပါတယ်” ဟု ၎င်းဒေသခံက ဆက်လက်ပြောကြားသည်။

လက်ရှိ ရန်ကုန် – မော်လမြိုင်ကားလမ်း ဆက်သွယ်ရေးပြတ်တောက်နေပြီး နှစ်ဖက်ယာဉ်အစီးရေရာနှင့်ချီပြီး ပိတ်ဆို့နေကြောင်း ၎င်းဒေသခံကဆိုသည်။

“ရွာလမ်းတွေထဲက သွားလို့အဆင်မပြေလောက်ဘူး။ လမ်းတွေက ရေကျော်နေကြတဲ့အပြင် မြေသားလမ်းတွေဆိုတော့ ဗွက်တွေနစ်နိုင်တယ်” ဟု ၎င်းဒေသခံက ဆက်လက်ပြောကြားသည်။

ပြီးခဲ့သည့် ဇူလိုင်လ (၁၆) ရက်နေ့ ညပိုင်းကလည်းသထုံမြို့နယ် မိုးကောင်းကျေးရွာအုပ်စု၊ ကရင်လေးဆိပ်ကျေးရွာအနီး ဗိုလ်ခမ်းကွင်းအရှေ့ ရန်ကုန် – မော်လမြိုင်ကားလမ်းပေါ်ရှိ ဒေသအခေါ် ကရင်လေလေးဆိပ်တံတားမှာ KNU/ PDF အဖွဲ့က မိုင်းထောင်ဖောက်ခွဲဖျက်ဆီးခဲ့ကြောင်း သတင်းများက ဖော်ပြသည်။