👨‍🎤မြဝတီမြို့နယ် အွန်လိုင်းရာဇဝတ်ဂိုဏ်းမှ အိန္ဒိယနိုင်ငံသား ၈ ဦး ထပ်မံလွတ်မြောက်

မြဝတီမြို့နယ်၊ ဖားလူးဒေသ အွန်လိုင်းရာဇဝတ်ဂိုဏ်းမှ အိန္ဒိယနိုင်ငံသား ၈ ဦး ထပ်မံလွတ်မြောက် လာကြောင်း ယမန်နေ့က ရန်ကုန်မြို့ရှိ အိန္ဒိယသံရုံးမှ သတင်းထုတ်ပြန်ခဲ့သည်။

ပြီးခဲ့သည့် ဇူလိုင်လ (၁၉) ရက်က ရွှေကုက္ကိုမြို့သစ်နှင့် ဖလူးအွန်လိုင်းငွေလိမ်စင်တာများမှ ပိတ်မိနေသော အိန္ဒိယနိုင်ငံသား ၁၁ ဦးတို့ ပြန်လည်လွတ်မြောက်လာပြီး နောက်ဆက်တွဲလွတ်မြောက်လာခြင်း ဖြစ်သည်။

ပြန်လည်လွတ်မြောက်လာသူများကို မြဝတီမြို့ DKBA ဆက်ဆံရေးရုံးမှ မြန်မာအစိုးရ လဝကအရာရှိများထံ လွှဲအပ်ပေးခဲ့ကြောင်း ဓါတ်ပုံသတင်းအရ သိရသည်။
မြန်မာနိုင်ငံရှိ အွန်လိုင်း ရာဇဝတ်ဂိုဏ်းများမှ လစာကောင်းကောင်းဖြင့် အလုပ်ပေးမည်ဆိုပြီး လိမ်လည်ဖျားယောင်းသည့် ထောင်ချောက်ထဲ ရောက်မသွားစေရန် သတိထားကြဖို့ အိန္ဒိယနိုင်ငံသားများကို မြန်မာနိုင်ငံဆိုင်ရာ အိန္ဒိယသံရုံးက ကြေညာချက်ထုတ်ပြန်ခဲ့သည်။

ပြီးခဲ့သည့် ၂၀၂၂ ခုနှစ် အောက်တိုဘာလကလည်း မြန်မာ၊ ကမ္ဘောဒီးယားနှင့် လာအိုနိုင်ငံက အွန်လိုင်း ရာဇဝတ်ဂိုဏ်းများမှ အတင်းအကျပ် အလုပ်ခိုင်းခံရသည့် အိန္ဒိယနိုင်ငံသား ၁၃၀ ကို အိန္ဒိယအစိုးရက ကယ်တင်ခဲ့ဖူးကြောင်း သိရသည်။