👨‍🎤ရွှေကုက္ကိုနှင့်ဖလူး အွန်လိုင်းငွေလိမ်စင်တာများမှ အိန္ဒိယနိုင်ငံသား ၁၁ ဦး ပြန်လွတ်မြောက်လာ

ကရင်ပြည်နယ် ထိုင်း-မြန်မာနယ်စပ်၊ မြဝတီမြို့နယ် ရွှေကုက္ကိုမြို့သစ်နှင့် ဖလူးအွန်လိုင်းငွေလိမ်စင်တာများတွင် ပိတ်မိနေသော အိန္ဒိယနိုင်ငံသား ၁၁ ဦးတို့ ပြန်လည်လွတ်မြောက်လာကြောင်း ရန်ကုန်မြို့ရှိ အိန္ဒိယသံရုံးက သတင်းထုတ်ပြန်ခဲ့သည်။

ဇူလိုင် (၁၉) ရက်နေ့က ဒေသခံမြန်မာအာဏာပိုင်များ၏ အကူအညီဖြင့် အဆိုပါ အိန္ဒိယ နိုင်ငံသား ၁၁ ဦးတို့ ပြန်လည်လွတ်မြောက်လာကြပြီး အိန္ဒိယနိုင်ငံသို့ နေရပ်ပြန်ရေးကိစ္စရပ်များကို ဆက်လက် ဆောင်ရွက်နေကြောင်း သိရသည်။

အွန်လိုင်းလောင်းကစားလုပ်ငန်းနှင့် ငွေလိမ်ဂိုဏ်းများတွင် လူကုန်ကူးခံရခြင်း၊ ပိတ်လှောင်နှိပ်စက်ခံရခြင်း စသည့် နယ်စပ်ဖြတ်ကျော် ရာဇဝတ်မှုကိစ္စရပ်များ ဖြစ်ပေါ်နေသောကြောင့် ကရင်နယ်ခြားစောင့်တပ် (BGF) ထိန်းချုပ်ထားသည့် ရွှေကုက္ကိုလ်မြို့သစ်ဒေသကို နိုင်ငံတကာက အထူးအာရုံစိုက်ပြီး စောင့်ကြည့်နေကြသည်ဟု သတင်းများက ရေးသားဖော်ပြနေသည်။

တဖက်မှာလည်း အွန်လိုင်းငွေလိမ်ဂိုဏ်းများတွင် လုပ်ကိုင်နေကြသော နိုင်ငံခြားသားများအားလုံးသည် မေလ ၁ ရက်နေ့မှ အောက်တိုဘာလ ၃၁ ရက်အထိ ခြောက်လအတွင်း ရွှေကုက္ကိုလ်မြို့သစ်နှင့် မြဝတီမြို့နယ်မှ ထွက်ခွာသွားကြရန် အမိန့်ထုတ်ပြန်ကာ သက်ရောက်မှုရှိသော နေရာများတွင် စာကပ်ထားသည်။

သို့ရာတွင် အွန်လိုင်းငွေလိမ်လုပ်ငန်းများသည် ကရင်ပြည်နယ်အတွင်း ဆက်လက်လည်ပတ်နေဆဲဖြစ်သလို လက်ရှိတွင် ဘုရားသုံးဆူမြို့သို့ Call Center ခေါ် အွန်လိုင်းငွေလိမ်လုပ်ငန်း လုပ်ကိုင်သူ တရုတ်နိုင်ငံသား အများအပြား ပြောင်းရွှေ့ဝင်ရောက်ရှိလာကြောင်း သိရသည်။