🤙ဂျိုင်းမြစ်ဝှမ်းဒေသမှ နေရပ်စွန့်ခွာစစ်ဘေးရှောင်များအနေဖြင့် မွန်စစ်ဘေးရှောင်ကူညီရေးအဖွဲ့နှင့် ဆက်သွယ်ချိတ်ဆက်ထားကြရန်တိုက်တွန်း

ကရင်ပြည်နယ် ကော့ကရိတ်မြို့နယ်အတွင်းရှိ ကျေးရွာတချို့ နှင့် မွန်ပြည်နယ် ကျိုက်မရောမြို့နယ်အတွင်းရှိ ကျေးရွာများပါဝင်သည့် ဂျိုင်းမြစ်ဝှမ်းဒေသမှ နေရပ်စွန့်ခွာစစ်ဘေးတိမ်းရှောင် ဒေသခံပြည်သူများအနေဖြင့် ထောက်ပံ့ကူညီရေးပစ္စည်းများ ရရှိစေရန်အတွက် မွန်စစ်ဘေးရှောင်ကူညီရေးအဖွဲ့နှင့် ဆက်သွယ်ချိတ်ဆက်ထားကြရန် ယင်းအဖွဲ့မှ တိုက်တွန်းပြောကြားထားသည်။

နေရပ်စွန့်ခွာစစ်ဘေးတိမ်းရှောင်နေခဲ့ကြရသည့် ဒေသခံပြည်သူများအနေဖြင့် မော်လမြိုင်၊ ဘီလူးကျွန်း (ချောင်းဆုံ)၊ ကျိုက်မရော၊ မုဒုံ အပြင် တချို့မှာလည်း ရန်ကုန်အထိသွားရောက်ကာ နေထိုင်နေကြသူများလည်း ရှိကြောင်း၊ ထိုအခြေအေနများကြောင့် နေရပ်စွန့်ခွာ စစ်ဘေးတိမ်းရှောင်သူများ၏စာရင်းများ ကောက်ယူပြုစုရာ၌ အခက်အခဲများရှိနေကြသည့်အတွက်ကြောင့် အိမ်ထောင်စုနှင့် လူဦးရေစာရင်းကအစ ကွဲလွဲမှုများဖြစ်ပေါ်နေကြောင်း မွန်စစ်ဘေးရှောင်ကူညီရေးအဖွဲ့မှ တာဝန်ရှိသူတစ်ဦးက ပြောကြားသည်။

“လတ်တလောမှာ အစောပိုင်းကောက်ယူထားတဲ့ စာရင်းတွေအရ ဦးစားပေးအဆင့်တွေကိုဘဲ ထောက်ပံ့ဖြစ်နေတာပါ။ နောက်ထပ်လည်း စာရင်းတွေထပ်မံပြုစုနေတဲ့အတွက်ကြောင့် စာရင်းမသွင်းရသေးတဲ့ စစ်ဘေးသင့် အိမ်ထောင်စုတွေအနေနဲ့ မွန်စစ်ဘေးရှောင်ကူညီရေးအဖွဲ့ထံမှာ လာရောက်စာရင်းပေးသွင်းကြဖို့ ထပ်မံတိုက်တွန်းလိုပါတယ်” ဟု ၎င်းတာဝန်ရှိသူက ဆက်လက်ပြောကြားသည်။

လတ်တလော ပြည်တွင်း၊ ပြည်ပ အဖွဲ့အစည်းများမှ နေရပ်စွန့်ခွာစစ်ဘေးတိမ်းရှောင်နေကြရသည့် ဒေသခံပြည်သူများအား ကူညီထောင်ပံ့ရေးပစ္စည်းများ လာရောက်ပေးအပ်လှူဒါန်းနေကြသည့် သတင်းများကြောင့်လည်း သက်ဆိုင်ရာအဖွဲ့အစည်းများထံသို့ ဆက်သွယ်အကြောင်းကြားလာကြသည့် စစ်ဘေးရှောင်များလည်းရှိနေကြောင်းလည်း ၎င်းက ဆိုသည်။

၎င်းက “သက်ဆိုင်ရာကျေးရွာအုပ်ချုပ်ရေးအဖွဲ့တွေမှာ ရှိကြတဲ့ စာရင်းကတစ်မျိုး၊ ဒေသခံတွေပြုစုထားတဲ့ စာရင်းကတစ်မျိုး၊ မွန်ပြည်သစ်ပါတီ သထုံခရိုင်က ကောက်ယူထားတဲ့ စာရင်းကတစ်မျိုး၊ နောက် မွန်စစ်ဘေးရှောင်ကူညီရေးအဖွဲ့က ပြုစုထားတဲ့ စာရင်းကတစ်မျိုးဖြစ်နတော့ စာရင်းတွေကို တိုက်စစ်နေရပါတယ်။ တချို့လည်း စစ်ဘေးတိမ်းရှောင်နေကြရပေမယ့် အမည်စာရင်းမပါဝင်ကြသူတဲ့ မိသားစုတွေလည်းရှိနေကြသေးတယ်။ တချို့လည်း ထောက်ပံ့ရေးပစ္စည်းတွေ လာပေးတော့မှ စာရင်းလာသွင်းကြသူတွေလည်းရှိတယ်” ဟု ဆက်လက်ပြောကြားသည်။

ဂျိုင်းမြစ်ဝှမ်းရှိ နေရပ်စွန့်ခွာစစ်ဘေးသင့် ဒေသခံပြည်သူများအား ASEAN Coordinating Center for Humanitarian Assistance on disaster management (AHA Centre) မှ ပြီးခဲ့သည့် ဇူလိုင်လ (၁၀) ရက်နေ့က မော်လမြိုင်မြို့ရှိ သာသနာ (၂၅၀၀) မွန်ပရိယတ္တိစာသင်တိုက်တွင် လူသားချင်းစာနာမှု ထောက်ပံ့ရေးပစ္စည်းများအား အခမ်းအနားဖြင့် လာရောက်လှူဒါန်းခဲ့သည်။

ပြီးခဲ့သည့် မတ်လ (၂၄-၂၅) ရက်နေ့က KNU/KNLA/NMSP (AD)/PDF ပူးပေါင်းတပ်ဖွဲ့များက ကရင်ပြည်နယ် ကော့ကရိတ်မြို့နယ်၊ ကော့ဘိန်းကျေးရွာရှိ နယ်မြေရဲစခန်းအား တိုက်ခိုက်သိမ်းပိုက်ခဲ့ကြောင်း၊ ၎င်းလက်နက်ကိုင်ပဋိပက္ခအတွင်း စစ်ကောင်စီရေတပ် စစ်သင်္ဘောမှ လက်နက်ကြီးဖြင့် ပစ်ခတ်မှုကြောင့် ကျိုက်မရောမြို့နယ်၊ ဓမ္မသကျေးရွာရှိ နေအိမ် (၃၀၀) ကျော် မီးလောင်ကျွမ်းပျက်စီးခဲ့ရသည့်ပြင်၊ ကျိုက်မရောမြို့နယ် တရနာကျေးရွာအနီးရှိ ကျွန်းကုန်ရွာတွင်လည်း (၂) ကြိမ်ထက်မနည်း မီးလောင်ကျွမ်းခဲ့သည်။

အဆိုပါ လက်နက်ကိုင်ပဋိပက္ခကြောင့် ကျောင်းထိုင်ဆရာတော်တစ်ပါးအပါအဝင် အရပ်သား (၃၀) ဦးထက်မနည်း ထိခိုက်သေဆုံးခဲ့ပြီး၊ ကော့ဘိန်းကျေးရွာနှင့် ဆက်စပ်နေသည့် ကော့ပေါက်၊ ကော့ပလိုင်၊ ကော့မိတ်၊ ဓမ္မသ၊ သံကလောင်၊ ကျွန်းရွာ၊ တရနာ၊ ကော့သိပ်၊ ကော့စွယ် ဒေသခံပြည်သူ (၅၀၀၀၀) ကျော်မှာလည်း နေရပ်စွန့်ခွာကာ စစ်ဘေးတိမ်းရှောင်နေခဲ့ကြရသည်။

ထို့နောက် ဧပြီလ (၂၅) ရက်နေ့တွင် ယင်းဒေသအား စစ်တပ်မှ ပြန်လည်တိုက်ခိုက်သိမ်းပိုက်ခဲ့ပြီးနောက် နယ်မြေစိုးမိုးမှုရယူထားကြောင်း သိရသည်။