Kawao News – ဧပြီ ၂၁၊ ၂၀၂၅
ကော့ကရိတ်မြို့တွင် စစ်ကောင်စီတပ်ဖွဲ့များအနေဖြင့် မြို့ထဲမှ ပြည်သူများကို အခြားဒေသများသို့ ထွက်ခွာခွင့်မပြုတော့သောကြောင့် အစားအသောက်နှင့် လိုအပ်သောကုန်ကြမ်းများ ရှားပါးလာနေကြောင်း ဒေသခံများက ပြောကြားခဲ့သည်။
မြို့ခံတစ်ဦးက “၁၅ ရက်နေ့ကစပြီး စစ်တပ်က မြို့ပြင်ဘက်ကို ဘယ်သူမျှ ထွက်ခွာခွင့်မပြုတော့ပါဘူး။ လူတွေမြို့ထဲမှာပိတ်မိနေကြပြီး စားစရာတွေလည်း နည်းလာတယ်။ ဆန်ဈေးတစ်ဆကျော်တက်လာပြီ၊ ဆီဈေးလည်း တက်လာပါတယ်” ဟု ပြောသည်။
အနီးတဝိုက်ကျေးရွာ/ဒေသများတွင် ပစ်ခတ်သံများ ကြားရသည့်အပြင် လေကြောင်းမှ လက်နက်ကြီးပေါက်ကွဲသံများလည်း ကြားနေရသည်ဟု ဆိုသည်။
ထို့အပြင် KNLA ပူးပေါင်းတပ်ဖွဲ့များက လေးတိုင်၊ ငါးတိုင်နှင့် နွားခြံကုန်းရွာများကို ထိန်းချုပ်ထားလိုက်ပြီး မြို့အဝင်အထွက်များကို စစ်ကောင်စီဘက်က တင်းကျပ်စွာ ထိန်းချုပ်နေသည့်အတွက် ပြည်သူအများအတွက် လွတ်လပ်စွာသွားလာမရတော့သည့် အခြေအနေဖြစ်လာသည်။
၎င်းအခြေအနေသည် စစ်ရှောင်များအပါအဝင် လူထုအများစုအတွက် များပြားသော စားဝတ်နေရေးအခက်အခဲများ ဖြစ်ပေါ်စေနိုင်သည်ဟု ဒေသခံများက သတိပေးကြသည်။
သတင်းအရ၊ မနေ့တုန်းကအထိ ကော့ကရိတ်-ကျုံဒိုးအနီး ကျေးရွာ ၁၀ ကျော်ရှိ ပြည်သူများသည် လေကြောင်းမှ ဗုံးကြဲတိုက်ခိုက်မှုကြောင့် ဘေးလွတ်ရာသို့ စစ်ရှောင်ထွက်ပြေးရသော်လည်း စစ်ကောင်စီကထိန်းချုပ်ထားသည့်နေရာများတွင် ထွက်ခွာခွင့်မပြုသဖြင့် ပြန်လည်ပိတ်မိနေသည့်သူများလည်း ရှိနေဆဲဖြစ်သည်။
သတင်းအရင်းအမြစ်များအဆိုအရ၊ ဧပြီလ ၁၅ ရက်နေ့တွင် စစ်ကောင်စီက မြို့နယ်အတွင်းရှိ ဘုန်းကြီးကျောင်းများနှင့် နေထိုင်ရာ ကျေးရွာများသို့ လေကြောင်းဗုံးကြဲတိုက်ခိုက်ခဲ့ရာတွင် သံဃာတော်များအပါအဝင် အနည်းဆုံး ၁၅ ဦးသေဆုံးပြီး ၃၀ ဦးကျော်ထိခိုက်ဒဏ်ရာရရှိခဲ့ကြောင်း သိရှိရသည်။
