ဘီးလင်း၊ ဧပြီ ၂၁၊
မွန်ပြည်နယ် ဘီးလင်းမြို့နယ်၊ အလူးလေးကျေးရွာအနီး ရန်ကုန်-မော်လမြိုင်ကားလမ်းမပေါ်၌ ယမန်နေ့ (ဧပြီ ၂၁) နံနက် ၁၁ နာရီခန့်က စစ်ကောင်စီတပ်နှင့် တော်လှန်ရေးပူးပေါင်းအဖွဲ့များ အကြား တိုက်ပွဲဖြစ်ပွားခဲ့ပြီး နှစ်ဖက်စလုံးမှ ထိခိုက်သေဆုံးမှုများရှိခဲ့ကြောင်း ဒေသခံများက ပြောဆိုသည်။
စစ်ကောင်စီတပ်မှ လှည့်ကင်းထွက်စဉ် အလူးလေးကျေးရွာအနီးတွင် တော်လှန်ရေးအင်အားစုများနှင့် ထိတွေ့မှုဖြစ်ပွားကာ မိနစ် ၃၀ နီးပါး ပစ်ခတ်မှုများကြာမြင့်ခဲ့သည်။
ဒေသခံတစ်ဦးက “တိုက်ပွဲဖြစ်ပြီးနောက် လမ်းပိတ်သွားတယ်။ မော်တော်ယာဉ်တွေ မသွားလာနိုင်ဘဲ နာရီပိုင်းကြာမှ ပြန်ဖွင့်တာ” ဟု ရှင်းပြသည်။
တိုက်ပွဲကြောင့် ရန်ကုန်-မော်လမြိုင်ကားလမ်းမ ယာယီပိတ်ဆို့ခံခဲ့ရပြီး မွန်းတည့်ချိန်တွင်မှ ပြန်လည်ဖွင့်လှစ်နိုင်ခဲ့ခြင်း ဖြစ်သည်။
စစ်ကောင်စီဘက်မှ ထိခိုက်ဒဏ်ရာရသူများကို ဘီးလင်းမြို့နယ်ဆေးရုံသို့ ပို့ဆောင်ကုသမှုခံယူစေခဲ့ကြောင်း သိရသည်။
ထို့အပြင် ဧပြီ ၂၀ ရက်က ကျိုက်ထိုမြို့နယ် အင်္ဂဘိုကျေးရွာအနီးတွင်လည်း အလားတူတိုက်ပွဲဖြစ်ပွားခဲ့ပြီး စစ်ကောင်စီတပ်သား ၃ ဦး သေဆုံးကာ တော်လှန်ရေးဘက်မှ ၁ ဦးကျဆုံး၊ ၁ ဦးဒဏ်ရာရကြောင်း တော်လှန်ရေးအင်အားစုများက ထုတ်ပြန်ထားသည်။
မွန်ပြည်နယ်အတွင်းရှိ ရန်ကုန်-မော်လမြိုင်လမ်းမကြီးသည် စစ်ကောင်စီ၏ လှည့်ကင်းနှင့် ယာဉ်တန်းများအား တော်လှန်ရေးအင်အားစုများက မကြာခဏ တိုက်ခိုက်လေ့ရှိသည့် နေရာဖြစ်ကြောင်း ဒေသခံများက ပြောသည်။
Photo- ပုံအဟောင်း
