အွန်လိုင်းလိမ်လည်ခံရသူတွေ ငွေပြန်ရဖို့ နည်းဥပဒေ၂ ခု ထိုင်းအစိုးရအတည်ပြုလိုက်ပြီ

ထိုင်းအစိုးရအဖွဲ့က အွန်လိုင်းလိမ်လည်ခံရသူတွေ အမြန်ငွေပြန်ရဖို့နဲ့ ပြစ်မှုဖြစ်လာရင် ဘဏ်တွေ၊ ဆက်သွယ်ရေးကုမ္ပဏီတွေ၊ လူမှုပလက်ဖောင်းတွေကို မျှဝေတာဝန်ယူစေဖို့ နည်းဥပဒေ၂ ခု အတည်ပြုလိုက်ပါတယ်။

ဒစ်ဂျစ်တယ်စီးပွားရေးနဲ့ လူမှုအဖွဲ့အစည်းဝန်ကြီး ပရဆက် ခါန်တာရုအောင်သုန်းက အင်္ဂါနေ့မှာ ကြေညာချက်ထုတ်ပြန်ပါတယ်။ အခုနည်းဥပဒေတွေကို ဘုရင့်ဂျာနယ် (Royal Gazette) မှာ ပြဋ္ဌာန်းပြီးတာနဲ့ စတင်အကျိုးသက်ရောက်မှာပါ။

ပထမနည်းဥပဒေက လက်ရှိ “နည်းပညာရာဇဝတ်မှု ကာကွယ်နှိမ်နင်းရေး အမိန့်ကြော်ငြာစာ” ကို အစားထိုးမှာဖြစ်ပြီး ဒုတိယဥပဒေက “ဒီဂျစ်တယ်ငွေကြေးလုပ်ငန်း လုပ်ကိုင်ခွင့် အမိန့်ကြော်ငြာစာ” ကို အစားထိုးပါမယ်။

ဝန်ကြီး ပရဆက်က “ဒီနည်းဥပဒေတွေက အွန်လိုင်းလိမ်လည်မှုတွေကို ထိထိရောက်ရောက်တားဖို့နဲ့ လက်ရှိထက် ငွေပြန်ရမြန်ဆန်ဖို့ အရေးပါတယ်” လို့ ပြောပါတယ်။ သူက ထိုင်းနှစ်သစ်ကူးသကြႅာန်မတိုင်ခင် ဒီဥပဒေတွေ စတင်အသက်ဝင်ဖို့ မျှော်လင့်နေတယ်လို့လည်း ဖြည့်စွက်ပြောပါတယ်။

ပြင်ဆင်ထားတဲ့ နည်းပညာရာဇဝတ်မှု ကာကွယ်ရေးဥပဒေအရ ဘဏ်တွေ၊ ဖုန်းလိုင်းကုမ္ပဏီတွေ၊ လူမှုမီဒီယာပလက်ဖောင်းတွေဟာ လိမ်လည်မှုကြောင့် ပျက်စီးရသူတွေကို အတူတကွ တာဝန်ယူပေးရမှာပါ။

ငွေကြေးဆိုင်ရာမှုခင်းကာကွယ်ရေးကော်မတီ (AMLO) က ဒီအဖွဲ့တွေကို ချက်ချင်းငွေပြန်ပေးဖို့ အမိန့်ချမှတ်နိုင်မှာဖြစ်လို့ လုပ်ငန်းစဉ်တွေ ပိုမြန်ဆန်သွားမှာဖြစ်ပါတယ်။ ဒီဥပဒေမှာ လူတွေရဲ့အချက်အလက်ရောင်းချသူတွေကိုလည်း ဒဏ်ငွေအပြင်းအထန် ချမှတ်သွားမှာပါ။