ရေး၊ မတ်လ ၂၇ — ရေးကားလမ်းမပေါ်တွင် စစ်ကောင်စီတပ်ဖွဲ့ဝင်များ လိုက်ပါလာသည့် မော်တော်ယာဉ်တစ်စီးအား တူးမြောင်းရွာအနီး၌ တိုက်ခိုက်မှုဖြစ်ပွားခဲ့ကြောင်း ရေးဘီလူးအဖွဲ့ထံမှ သိရသည်။
မတ်လ ၂၆ ရက် နံနက်ပိုင်းက ခမရ-၅၈၆ တပ်ရင်းမှ စစ်ကောင်စီအရာရှိနှင့် တပ်သားများ စီးနင်းလာသည့် အဖြူရောင် Vigo ကားအား တူးမြောင်းကျေးရွာနှင့် လေယာဉ်ကွင်းဟောင်းကြားတွင် ရေးဘီလူးအဖွဲ့က ကင်းပုန်းဝင်ပစ်ခတ်တိုက်ခိုက်ခဲ့ခြင်းဖြစ်သည်။
ဤတိုက်ခိုက်မှုတွင် စစ်ကောင်စီဘက်မှ အရာရှိတစ်ဦးနှင့် တပ်သား ၂ ဦး သေဆုံးခဲ့ပြီး ပစ်ခတ်ခံရသည့်ကားအား စုံနံ့သာကျေးရွာဘက်သို့ မောင်းနှင်ထွက်ပြေးခဲ့ကြောင်း၊ ရေးဘီလူးအဖွဲ့ဝင်များ ထိခိုက်မှုမရှိဘဲ အောင်မြင်စွာ ဆုတ်ခွာနိုင်ခဲ့ကြောင်း အဖွဲ့တာဝန်ရှိသူက ပြောကြားသည်။ သို့သော် ဤဖြစ်စဉ်နှင့်ပတ်သက်၍ စစ်ကောင်စီဘက်မှ တရားဝင်ထုတ်ပြန်ချက် မရှိသေးပေ။
တိုက်ခိုက်မှုအပြီး နယ်မြေအနီးရှိ စစ်ကောင်စီတပ်ရင်းများက လက်နက်ကြီး ၂ လုံးဖြင့် ရမ်းသမ်းပစ်ခတ်မှုများ ပြုလုပ်ခဲ့ကြောင်း ဒေသခံများက ဆိုသည်။
ယခုလတ်တလောတွင် ရေးမြို့နယ်အတွင်း စစ်ကောင်စီနှင့် တော်လှန်ရေးအင်အားစုများ အကြားအပြန်အလှန်ပစ်ခတ်မှုများ မကြာခဏဖြစ်ပွားလျက်ရှိရာ မတ်လ ၇ ရက်က အာယုတောင်ကျေးရွာဘက်သို့ စစ်ဆေးရေးလုပ်ပြီး ပြန်လာစဉ် စစ်ကောင်စီစစ်ကြောင်းအား တော်လှန်ရေးအဖွဲ့များက တိုက်ခိုက်ခဲ့ရာ စစ်ကောင်စီတပ် ၇ ဦး သေဆုံးပြီး ၁၀ ဦးအထက် ဒဏ်ရာရခဲ့သည်ဟု တော်လှန်ရေးဘက်က ထုတ်ပြန်ခဲ့သည်။
