စစ်ကောင်စီ အာဏာသိမ်းပြီးနောက် ရှမ်းပြည်နယ်တောင်ပိုင်းဒေသတွင် အာဏာပိုင်များကို လာဘ်ငွေထိုးပြီး ဘိန်းစိုက်ပျိုးခွင့်ရနေသောကြောင့် ဘိန်းစိုက်ပျိုးမှု နှစ်စဉ်စံချိန်တင် မြင့်တက်လာကာ မတ်လတတိယပတ်အတွင်း ဘိန်းမည်းတစ်ပိဿာလျှင် ကျပ် ၁၄ သိန်းအထိ စျေးကွက်ရှိလာသည်ဟု သိရသည်။
ဒေသခံအာဏာပိုင်များ၊ စစ်တပ်နှင့် ပြည်သူ့စစ်များထံ လာဘ်ငွေထိုးမှုများဖြင့် ဘိန်းစိုက်ခွင့် ဝယ်ယူနေကြောင်း ဒေသခံများက ပြောဆိုသည်။
“အာဏာသိမ်းပြီးမှ အင်းလေးကန်ဘေးက ကျေးရွာတွေမှာ ဘိန်းစိုက်တာ စပြီးများလာတယ်။ အာဏာပိုင်တွေ၊ စစ်တပ်နဲ့ ပြည်သူ့စစ်တွေကို ငွေကြေးအဆက်မပြတ်ပေးနေရလို့ ဘယ်သူမှ ဝင်မဟန့်တားနိုင်ဘူး” ဟု အမည်မဖော်လိုသော ဒေသခံတစ်ဦးက ပြောသည်။
စစ်ကောင်စီအုပ်စုသည် နိုင်ငံရေးနှင့် တော်လှန်ရေးလှုပ်ရှားသူများကို ဖမ်းဆီးချုပ်နှောင်ရေးတွင် အာရုံစိုက်နေစဉ်၊ ရှမ်းတောင်ပိုင်းဒေသ၌ ဘိန်းစိုက်ပျိုးမှု၊ မူးယစ်ဆေးဝါးလုပ်ငန်းများနှင့် တရားမဝင်စီးပွားရေးလုပ်ငန်းများကို ဒေသခံအာဏာပိုင်များက လာဘ်ယူခွင့်ပြုနေသည်ဟု သတင်းရင်းမြစ်များက ဆိုသည်။
အထူးသဖြင့် ပအိုဝ်းပြည်သူ့စစ်နှင့် အင်းလေးပြည်သူ့စစ်တို့ ထိန်းချုပ်ထားသော ဟိုပုံး၊ ဆီဆိုင်၊ ညောင်ရွှေစသည့် မြို့နယ်များတွင် ဘိန်းခင်းဧရိယာ သိသာစွာတိုးလာခဲ့သည်။
ကုလသမဂ္ဂ၏ ၂၀၂၄ ခုနှစ် အစီရင်ခံစာအရ ရှမ်းပြည်နယ်တောင်ပိုင်းတွင် ဘိန်းစိုက်ဧရိယာသည် ဟက်တာ ၁၃,၀၀၀ ကျော်သို့ ရှိနေပြီး မြန်မာနိုင်ငံသည် ကမ္ဘာ့ဘိန်းထုတ်လုပ်မှု၏ ၈၈% ကို ထုတ်လုပ်နေဆဲဖြစ်သည်။
လက်ရှိတွင် ရေသွင်းစိုက်ဘိန်းမည်းများသည် တစ်ပိဿာလျှင် ကျပ် ၁၄ သိန်းအထိ ဈေးကောင်းရသော်လည်း စိုက်ပျိုးသူတောင်သူအများစုမှာ စစ်တပ်၊ ရဲ၊ ပြည်သူ့စစ်နှင့် အစိုးရအဖွဲ့အစည်းများထံ လာဘ်ငွေအဆင့်ဆင့်ပေးနေရသဖြင့် စားဝတ်နေရေးအတွက်သာ ရှင်သန်နိုင်ကြောင်း သိရသည်။
“ဘိန်းစိုက်တိုင်း ငွေကြေးအမြတ်ထွက်ပေမယ့် အာဏာပိုင်တွေကို လက်ဆောင်ပေးရတာကြောင့် တကယ့်အမြတ်က တောင်သူတွေလက်ထဲ မကျန်ပါဘူး” ဟု ဒေသတွင်းမှ တောင်သူတစ်ဦးက ဖွင့်ဟသည်။
ဤသို့ဖြင့် စစ်အာဏာရှင်စနစ်အောက်တွင် အာဏာပိုင်များ၏ လာဘ်ထိုးမှုစနစ်သည် ရှမ်းပြည်တောင်ပိုင်း၌ ဘိန်းစိုက်ပျိုးမှုကို အရှိန်မြင့်စေနေသည်ဟု ဝေဖန်သူများက သုံးသပ်နေသည်။
