ထိုင်းနိုင်ငံ ကန်ချနပူရီခရိုင် နယ်စပ်တစ်လျှောက်၌ မြန်မာနိုင်ငံမှ ရွှေ့ပြောင်း အလုပ်သမား ၃၂ ဦးကို ထိုင်းစစ်တပ်နှင့် လုံခြုံရေးတပ်ဖွဲ့များက ယမန်နေ့ (မတ်လ ၆ ရက်နေ့)တွင် ဖမ်းဆီးခဲ့သည်။ ယင်းတို့သည် မြန်မာနိုင်ငံတွင်း စစ်မှုထမ်းခြင်းမှ ရှောင်ရှားရန် နှင့် စီးပွားရေး အခက်အခဲများကြောင့် ထိုင်းနိုင်ငံသို့ တရားမဝင် ဝင်ရောက်လာကြခြင်း ဖြစ်သည်။
ဖမ်းဆီးခံရသူများသည် ကန်ချနပူရီခရိုင်၊ စံခလပူရီမြို့နယ်မှ သစ်တောလမ်းကြောင်းကို ဖြတ်သန်းကာ ထိုင်းနိုင်ငံအတွင်းသို့ ဝင်ရောက်လာခဲ့ကြသည်။ ထို့နောက် ထိုင်းနိုင်ငံတွင်း အလုပ်လုပ်ရန် ရည်ရွယ်ချက်ဖြင့် လမ်းကြောင်းပေးသူများထံမှ ကြိုတင်စီစဉ်ထားသည့် ယာဉ်များဖြင့် သွားရောက်ရန် ကြိုးပမ်းနေစဉ် ထိုင်းတပ်ဖွဲ့ဝင်များက ဖမ်းဆီးနိုင်ခဲ့ခြင်း ဖြစ်သည်။
ဖမ်းဆီးခံရသူများအား စစ်ဆေးရာတွင် ယင်းတို့သည် ထိုင်းနိုင်ငံသို့ တရားဝင် ဝင်ရောက်ခွင့် မရှိကြောင်း၊ မည်သည့် စာရွက်စာတမ်းမျှ မပြသနိုင်ကြောင်း၊ ထို့အပြင် ယင်းတို့သည် ထိုင်းနိုင်ငံတွင်း အလုပ်လုပ်ရန် ရည်ရွယ်ချက်ဖြင့် လမ်းကြောင်းပေးသူများထံမှ ဝန်ဆောင်ခ ၂၀,၀၀၀ ဘတ် ပေးဆောင်ရန် သဘောတူထားကြောင်း ဖော်ထုတ်ခဲ့သည်။
ဤဖြစ်စဉ်မတိုင်မီက စံခလယ်မြစ်မှ တစ်ဆင့် တရားမဝင်အလုပ်သမား ၁၃ ဦးကို လှေဖြင့် သယ်ဆောင်လာသူတစ်ဦးအား ထိုင်းတပ်ဖွဲ့ဝင်များက ဖမ်းဆီးခဲ့သည်။ လှေမောင်းသူသည် အင်ဂျင်ပိတ်၍ မြစ်အတွင်း စုန်ဆင်းလာစဉ် ထိုင်းတပ်ဖွဲ့ဝင်များက လိုက်လံဖမ်းဆီးခဲ့ခြင်း ဖြစ်သည်။ လှေပေါ်တွင် ပါဝင်သူများသည် မည်သည့် စာရွက်စာတမ်းမျှ မပြသနိုင်ကြောင်း၊ ထိုင်းဘာသာစကား မပြောတတ်ကြောင်း သိရသည်။
ဖမ်းဆီးခံရသူများအား ထိုင်းနိုင်ငံ၏ လူဝင်မှုကြီးကြပ်ရေး ဥပဒေအရ “တရားမဝင် နယ်စပ်ဖြတ်ကျော်ဝင်ရောက်သူများ” အဖြစ် စံခလပူရီရဲစခန်း၌ ထိန်းသိမ်းထားပြီး စွဲချက်တင်ကာ ဥပဒေအရ အရေးယူသွားမည်ဟု သိရသည်။
မြန်မာနိုင်ငံတွင် စစ်မှုထမ်းခြင်းကို မလုပ်ချင်သူများနှင့် စီးပွားရေး အခက်အခဲများကြောင့် ထိုင်းနိုင်ငံသို့ တရားမဝင် ဝင်ရောက်လာသူများ များပြားလာနေသည်။ ယင်းတို့သည် ထိုင်းနိုင်ငံတွင်း အလုပ်လုပ်ကိုင်ရန် ရည်ရွယ်ချက်ဖြင့် လမ်းကြောင်းပေးသူများထံမှ ဝန်ဆောင်ခ များစွာ ပေးဆောင်ကာ နယ်စပ်ဖြတ်ကျော်ဝင်ရောက်လာကြခြင်း ဖြစ်သည်။
ထိုင်းနိုင်ငံအနေဖြင့် နယ်စပ်တစ်လျှောက် လုံခြုံရေးတပ်ဖွဲ့များကို ချထားကာ မှောင်ခို ဝင်ရောက်မှုများကို ကာကွယ်ရန် ကြိုးပမ်းလျက်ရှိသည်။ ယင်းသို့ ဖမ်းဆီးမှုများသည် နေ့စဉ်နီးပါး ဖြစ်ပွားနေပြီး မြန်မာနိုင်ငံမှ ရွှေ့ပြောင်း အလုပ်သမားများ၏ အခြေအနေကို မီးမောင်းထိုးပြနေသည်။
Ref; ข่าวเด่นภูมิภาคทั่วไทย กาญจนบุรี
