မော်လမြိုင် – ရေး ကားလမ်းပိုင်းတွင် စစ်ကောင်စီဂိတ်ပေါင်း ၁၀ ဂိတ်ကျော်ရှိနေပြီး ခရီးသည်များထံမှာ ငွေကြေးများကောက်ခံလျက်ရှိရာ တစ်နိုင်ငံလုံးတွင် အဆိုးရွားဆုံးဖြစ်နေကြောင်း သိရသည်။
အရှည် ၉၈ မိုင်ခန့်ရှိသော မော်လမြိုင်-ရေးကားလမ်းတွင် မွန်ပြည်နယ်မှတ်ပုံတင် ၁၀/ ကိုင်ဆောင်သူမဟုတ်သည့် ခရီးသွားများအနေဖြင့် ယခင်က ဂိတ်ကြေးငွေကျပ်တစ်သောင်းဝန်းကျင်သာကုန်ကျခဲ့သော်လည်း ယခုအခါ ငွေကျပ်နှစ်သောင်းဝန်းကျင်အထိ ကုန်ကျလာသည်ဟု ခရီးသွားများနှင့် ခရီးသည်တင်ယာဉ်လိုင်းများထံက သိရသည်။
“မွန်ပြည်နယ်မှတ်ပုံတင်ကိုင်ထားတဲ့ လူတွေကိုလည်း တစ်ဂိတ်ရောက်ရင် တစ်ဦးကို ၁၀၀၀ ကောက်တယ်၊ အချို့ဂိတ်တွေက ၂၀၀၀ ကောက်တယ်၊ ဂိတ်တိုင်းနော် ဂိတ်က ၁၂ ခုလောက်ရှိတယ်၊ ရန်ကုန်ကနေလာတဲ့ ကားဆို ရေးကို ၆ နာရီအမှီဝင်ရမယ်ဆိုတော့ မော်လမြိုင်ကထွက်ကတည်းက ကြိုကောက်ထားရတယ်၊ ဒေသပြင်ပဆိုရင် ၂၀၀၀ ကနေ အချို့ဂိတ်ဆို ၁၀၀၀၀ အထိယူတာ ရှိတယ်၊ မပေးတဲ့သူဆို အောက်ကိုခေါ်ဆင်းပြီး မေးခွန်းတွေ တစ်ခုပြီးတစ်ခု မေးတော့တာဘဲ၊ အချို့ဆို ဝန်ထမ်းတွေပါလို့ ပြောလဲမရဘူး၊ ကောက်တာပဲ ဒီလမ်းပိုင်းမျိုးက မြန်မာနိုင်ငံမှာ အဆိုးဆုံးလို့ပြောလို့ရတယ်၊ အဓိကကောက်တဲ့အပိုင်းကတော့ သံဖြူဇရပ်-ရေး လမ်းပိုင်းပါ ” ဟု ရန်ကုန် – ရေးပြေးဆွဲနေသည့် ခရီးသည်တင်ယာဉ်လိုင်းမှ ယာဉ်မောင်းတစ်ဦးက ပြောကြားသည်။
ယခုပွင့်လင်းရာသီမှစတင်ကာ မွန်ပြည်နယ်အတွင်း နေထိုင်သူများကိုလည်း ဂိတ်ကြေးငွေများကောက်ခံလာပြီဖြစ်ရာ ငွေကျပ်တစ်သောင်းနီးပါး ပိုမိုကုန်ကျနေရသဖြင့် သေနတ်ပြခြိမ်ခြောက် ငွေတောင်းခံနေမှုအပေါ် ကြိတ်မှိတ်သည်းခံနေရကြောင်း၊ အရှည် ၅၇ မိုင်ခန့်ဝေးကွာသည့် သံဖြူဇရပ်-ရေးလမ်းမှာ အဆိုးဆုံးဖြစ်ကြောင်းဖြစ်ကြောင်း ဒေသခံခရီးသွားများက ပြောသည်။
”ဒေသတွင်းက လူတွေဆို အောင့်သက်သက်နဲ့ပဲ ပေးနေရတာ၊ သံဖြူဇရပ်မှာ အသက် ၇၀ လောက်ရှိတဲ့ စစ်သားအဖိုးကြီးကို မေးကြည့်ဖူးတယ်၊ ရတခတိုင်းက သူတို့ကိုခန့်ထားတာ၊ သူတို့စရိတ် သူတို့ဖာသာ သူတို့ရှာစားနေရတယ်၊ နေဖို့ စားဖို့၊ အကာအကွယ်လုပ်ဖို့ ဒါကြောင့် ငွေကိုအလှူခံတာလို့ ပြောတယ်၊ ကျန်တဲ့ဂိတ်တွေကတော့ ကားပေါ်လက်နက်နဲ့တကားကား တက်လာပြီး ခရီးသည်တိုင်း နှစ်ထောင်ထုတ်ထားပါဆိုပြီး လိုက်တောင်းတာပဲ၊ တော်လှန်ရေးတပ်သားတွေလဲ အဲ့ဘက်ပိုင်းမှာ ၂ နေရာလောက်စစ်ပေမယ့် ငွေကြေတောင်းတာမျိုးတော့ မရှိဘူး၊ ခုကာလက အဆိုးဆုံးဖြစ်လာတယ်၊ အချို့ကားသမားတွေကလည်း ဒါကိုမြင်ပြီး လောဘနဲ့လုပ်လာတာရှိတယ်၊ ခရီးသည်တွေက ငွေကြိုကောက်ပြီး တကယ်မစစ်ဘဲ ပိုက်ဆံပဲယူတဲ့ ခပ်ပေါ့်ပေါ့ဂိတ်တွေကို သူတို့ပေးသလောက်ပဲပေးနေတာမျိုးလည်း တွေနေရတယ်၊ စိတ်ပျက်စရာပဲ ” ဟု ရေးမြို့နေ ခရီးသွားပြည်သူတစ်ဦးက ပြောသည်။
ပြီးခဲ့သည့်နှစ်က မော်လမြိုင် – ရေးလမ်းပိုင်းရှိ ဂိတ်အချို့ကို တော်လှန်ရေးတပ်ဖွဲ့များ၏ တိုက်ခိုက်ခဲ့မှုကြောင့် ပိတ်သိမ်းခဲ့သော်လည်း ယခုနှစ်တွင် စစ်ကောင်စီဘက်က အင်အားထပ်မံဖြည့်တင်းလာပြီးနောက် ဂိတ်များ တိုးချဲ့ဖွင့်လှစ်လာခဲ့ကြောင်း သိရသည်။
Photo-မော်လမြိုင်-ရေးကားလမ်းမ
#အကျင့်ပျက်ခြစားမှု#လူ့အခွင့်အရေး#လုံခြုံရေး
#မော်လမြိုင်-ရေးကားလမ်း #စစ်ကောင်စီဂိတ်#ငွေကြေးများကောက်ခံ
