ပေါင်မြို့နယ် ဥတ္တံတား (အတွင်း) ကျေးရွာရှိ နေအိမ် (၆) လုံးအား စစ်ကောင်စီမှ ချိပ်ပိတ်သိမ်းဆည်းလိုက်ကြောင်း ဒေသခံများထံမှ သိရသည်။
အဆိုပါ ဥတ္တံတား (အတွင်း) ကျေးရွာသို့ စစ်ကောင်စီတပ်ဖွဲ့ဝင်အင်အား (၂၀) ကျော်အပြင် အုပ်ချုပ်ရေးအဖွဲ့မှ တာဝန်ရှိသူများမှ ကား (၃) စီးဖြင့်ရောက်ရှိလာပြီးနောက် ကျေးရွာနေ ဦးကျော်စွာ၊ ဦးအောင်ကျော်မိုး၊ ဒေါ်သန်းဦး။ ဦးစိန်သောင်း၊ ဦးဖိုးပျော့၊ ဦးစဦး တို့၏ နေအိမ်များအား အကြမ်းဖက်သမားများနှင့် ပတ်သက်ဆက်နွယ်မှုရှိသည်ဟုဆိုကာ ပြီးခဲ့သည့် နိုဝင်ဘာလ (၅) ရက်နေ့ မွန်းလွဲပိုင်းအချိန်က ချိပ်ပိတ်သွားခဲ့ခြင်းဖြစ်ကြောင်း ဒေသခံတစ်ဦးက ပြောကြားသည်။
“ပြီးခဲ့တဲ့ အောက်တိုဘာလဆန်းပိုင်းက သဲကုန်းကျေးရွာမှာ လက်နက်ခဲယမ်းတွေနဲ့အတူ ဖမ်းဆီးရမိခဲ့သူတွေရဲ့ နေအိမ်တွေ နေထိုင်ခဲ့တဲ့ နေအိမ်လို့ သိရတယ်။ အဲ့ဒီအိမ်တွေမှာ ကျန်ရစ်ခဲ့ကြတဲ့ မိဘတွေနဲ့ မိသားစုဝင်တွေကို နေအိမ်ချိပ်မပိတ်ခင်တစ်ပတ်လောက်အလိုကတည်းက အဲ့ဒီနေအိမ်တွေကနေ ပြောင်းရွေ့ဖို့ စစ်ကောင်စီတပ်ဖွဲ့ဝင်တွေက လာပြောသွားတယ်” ဟု ၎င်းဒေသခံက ဆက်လက်ပြောကြားသည်။
ထို ဥတ္တံတား (အတွင်း) ကျေးရွာရှိ နေအိမ်များအား စစ်ကောင်စီမှ ချိပ်ပိတ်ခဲ့ပြီးနောက်ပိုင်းတွင်လည်း စစ်ကောင်စီတပ်ဖွဲ့ဝင်များမှ နှစ်ရက်ခြားတစ်ကြိမ်၊ သုံးရက်ခြားတစ်ကြိမ် လှည့်ကင်းများလုပ်ဆောင်နေကြကြောင်းလည်း ၎င်းဒေသခံက ဆိုသည်။
ပြိးခဲ့သည့် အောက်တိုဘာလ (၄) ရက်နှင့် (၆) ရက်နေ့များတွင် ဥတ္တံတား (အတွင်း) ကျေးရွာ၊ ညောင်ကုန်းကြီးကျေးရွာ နှင့် သဲကုန်းကျေးရွာများတွင် ဒေသခံအမျိုးသား (၈) ဦးအား PDF အဖွဲ့ဝင်များဟုဆိုကာ စစ်ကောင်စီမှ ဖမ်းဆီးခဲ့သည်။
ပြီးခဲ့သည့် ဩဂုတ်လ (၁၉) ရက်နေ့၊ နံနက်ပိုင်းက ဥတ္တံတား (အပြင်) ကျေးရွာ၊ ရပ်ကွက် (၆)၊ ဘောဂဗလလမ်းရှိ ဦးပြည့်ဖြိုးအောင် ဆိုသူပိုင်ဆိုင်သော နေအိမ်ခြံဝင်အတွင်း လက်လုပ်မိုင်းပေါက်ကွဲမှုဖြစ်ပွားခဲ့ပြီးနောက်၊ လုံခြုံရေးတပ်ဖွဲ့မှ နယ်မြေရှင်းလင်းမှုလုပ်ဆောင်စဉ် ဖောက်ခွဲရေးနှင့် ဆက်စပ်သည့် ပစ္စည်းများ သိမ်းဆည်းရမိ ခဲ့သေးကြောင်းနှင့် ထိုနေအိမ်ခြံဝင်းကိုလည်း စစ်ကောင်စီမှ ချိပ်ပိတ်သိမ်းဆည်းခဲ့ကြောင်း ဒေသခံများထံမှ သိရသည်။
အလားတူ ပြီးခဲ့သည့် ဩဂုတ်လ (၂၈) ရက်နေ့ကလည်း ဥတ္တံတားကျေးရွာ အမှတ် (၂) ရပ်ကွက်နေ စိုးထိုက်အောင် ဆိုသူ၏ နေအိမ်ကိုလည်း အကြမ်းဖက်မှုတိုက်ဖျက်ရေး ဥပဒေအရ ချိပ်ပိတ်သိမ်းဆည်းခဲ့သေးကြောင်း သိရသည်။
မွန်ပြည်နယ်အတွင်း အမျိုးသားဒီမိုကရေစီအဖွဲ့ချုပ်ပါတီ (NLD) မှ ကိုယ်စားလှယ်များ၊ NLD ပါတီအား ဝန်းရံထောက်ခံအားပေးသူများ၏နေအိမ်တချို့ကိုလည်း အကြမ်းဖက်မှုတိုက်ဖျက်ရေး ဥပဒေအရ နိုင်ငံတော်ပိုင်အဖြစ် ချိပ်ပိတ်သိမ်းဆည်းခံထားရကြောင်း သိရသည်။
Photo-ချိပ်ပိတ်ခံရသည့်နေအိမ်များ
#ပေါင်မြို့နယ် #ဥတ္တံတား #စစ်ကောင်စီတပ်ဖွဲ့
#ဦးကျော်စွာ#ဦးအောင်ကျော်မိုး#ဒေါ်သန်းဦး#ဦးစိန်သောင်း#ဦးဖိုးပျော့#ဦးစဦး
