မော်လမြိုင်မြို့နယ်၊ ရိုးဂိုးကျေးရွာအပိုင် မော်လမြိုင် – မုဒုံကားလမ်းဘေးရှိ မင်းသန့်စက်သုံးဆီ အရောင်းဆိုင်တွင် ယနေ့ နိုဝင်ဘာ (၇) ရက် ညနေ (၅) နာရီခန့်ကစတင်ပြီး မီးအကြီးအကျယ်လောင်ကျွမ်းလျှက်ရှိကြောင်း သိရသည်။
အဆိုပါ မင်းသန့်စက်သုံးဆီ အရောင်းဆိုင်အနောက်ဘက်ရှိ ဆီလှောင်ကန်ပေါက်ကွဲရာမှ မီးတင်လောင်ကျွမ်းလျှက်ရှိကြောင်း နှင့် လက်ရှိ ည (၆) နာရီ (၃၀) မီနစ်အချိန်အထိ မီးလောင်ကျွမ်းနေဆဲဖြစ်ကြောင်း လူမှုကူညီကယ်ဆယ်ရေးအဖွဲ့မှ တာဝန်ရှိသူတစ်ဦးကပြောကြားသည်။
“ဆီကန်ပေါက်ကွဲမီးလောင်မှုဖြစ်တာလို့သိရတယ်။ မီးကအရမ်းများနေတယ်။ လောလောဆယ် တခြားနေရာတွေကို ကူးစက်လောင်ကျွမ်းမှုမရှိအောင် လုပ်ဆောင်နေကြပါတယ်” ဟု ၎င်းကဆက်လက်ပြောကြားသည်။
ထိုမီးလောင်မှုအား မြန်မာနိုင်ငံမီးသတ်တပ်ဖွဲ့ (မွန်ပြည်နယ်) ၊ မော်လမြိုင်ခရိုင် နှင့် မော်လမြိုင်မြိုနယ်အတွင်းရှိ မီးသတ်စခန်းများမှ မီးငြှိမ်းသတ်ယာဉ်များအပြင် မုဒုံမြို့နယ်မှ မီးသတ်ယာဉ်များ၊ လူမှုကူညီကယ်ဆယ်ရေးအသင်းများမှ ရေသယ်ယာဉ်များဖြင့် ဝိုင်းဝန်းငြှိမ်းသတ်ဆဲဖြစ်ကြောင်း သိရသည်။
