မုဒုံမြို့နယ် ကျိုက်ရွဲကျေးရွာရှိ ဟွန်ဒါမြန်မာသစ်ပါးလွှာ စက်ရုံမှ စက်ရုံမှူး၊ မန်နေဂျာနှင့် တရုတ်နိုင်ငံသားပညာရှင်တစ်ဦးတို့အား လက်နက်ကိုင်အဖွဲ့တစ်ဖွဲ့မှ ဝင်ရောက် ဖမ်းဆီးခေါ်ဆောင်သွားကြောင်း ယင်းစက်ရုံနှင့် နီးစပ်သူများထံမှ သိရသည်။
ပြီးခဲ့သည့် နိုဝင်ဘာလ (၆) ရက်၊ မွန်းလွဲ (၂) နာရီအချိန်ခန့်တွင် ကျိုက်ရွဲကျေးရွာရှီ ဟွန်ဒါမြန်မာ သစ်ပါးလွှာစက်ရုံဝင်းအတွင်းသို့ အင်အား (၂၀) ခန့်ရှိ လက်နက်ကိုင်အဖွဲ့တစ်ဖွဲဝင်ရောက်လာပြီးနောက်၊ သေနတ် (၄) ချက်ဖောက်ကာ မွန်ဘာသာဖြင့် “သူဌေးနဲ့ပဲ စကားပြောမယ်။ အေးအေးဆေးဆေးနေကြ” ဟု ပြောဆိုကာ ဝင်ရောက်လာကြကြောင်း ထိုစက်ရုံနှင့် နီးစပ်သူတစ်ဦးက ပြောကြားသည်။
“ပြီးတော့ စက်ရုံအတွင်းမှာရှိနေကြတဲ့ စက်ရုံမှူး၊ ဦးဘိုဘို၊ မန်နေဂျာ ဦးတင်ထွန်းအောင် နဲ့ တရုတ်နိုင်ငံသား ပညာရှင်တစ်ဦး စုစုပေါင်း (၃) ဦးကို ဖမ်းဆီးခေါ်ဆောင်သွားပြီးတော့ တော်ကူးကျေးရွာဘက်ကနေ လက်ခတ်တောင်ဘက်ကို ပြန်လည်ထွက်ခွာသွားကြတယ်လို့ ဒေသခံတွေထံက သိရပါတယ်” ဟု ၎င်းက ဆက်လက်ပြောကြားသည်။
ထို့အပြင် စက်ရုံရှိ အလုပ်သမားများထံမှ လည်း လက်ကိုင်ဖုန်းအလုံး (၂၀) ခန့်ကိုလည်း သိမ်းဆည်းယူဆောင်သွားကြကြောင်းလည်း ၎င်းကဆိုသည်။
ထိုဖြစ်စဉ်နှင့် ပတ်သက်ပြီး မည့်သည့်လက်နက်ကိုင်အဖွဲ့အစည်းက လုပ်ဆောင်ခဲ့သည်ကို မသိရသေးကြောင်း နှင့် ထိုလက်နက်ကိုင်အဖွဲ့မှ ဖမ်းဆီးခေါ်ဆောင်သွားသူများ ပြန်လည်လွတ်မြောက်လာရေးအတွက် စစ်ကောင်စီတပ်ဖွဲ့ဝင်များမှ လိုက်လံရှာဖွေမှုများလုပ်ဆောင်နေကြောင်း သိရသည်။
