ကယားပြည်နယ်သို့ ပြောင်းရွှေ့ရသည့်အတွက် မော်လမြိုင်ခရိုင်အုပ်ချုပ်ရေးမှူးဟောင်းဖြစ်သူ ဦးမြတ်ယု မှာ စစ်ကောင်စီလက်အောက်ခံ ဝန်ထမ်းအဖြစ်မှ နုတ်ထွက်သွားကြောင်း မွန်ပြည်နယ် ထွေ/အုပ်ဝန်ထမ်းအသိုင်းအဝိုင်းထံမှ သိရသည်။
ဦးမြတ်ယု မှာ မော်လမြိုင်ခရိုင်အုပ်ချုပ်ရေးမှူးရာထူးမှ ကယားပြည်နယ်သို့ ပြောင်းရွှေ့မိန့်ကျလာသည့်အတွက် နုတ်ထွက်စာတင်ပြီး နုတ်ထွက်သွားခြင်းဖြစ်ကြောင်း အမည်မဖေါ်လိုသူ ထွေ/အုပ်ဝန်ထမ်းတစ်ဦးက ပြောကြားသည်။
“ကယားပြည်နယ်ထက်စာရင် မွန်ပြည်နယ်က ပိုအေးချမ်းတော့ ကယားဘက်ကို မသွားချင်လို့ နုတ်ထွက်သွားတာလို့ သိရပါတယ်” ဟု ၎င်းထွေ/အုပ်ဝန်ထမ်းက ဆိုသည်။
နုတ်ထွက်စာတင်ပြီး နုတ်ထွက်သွားသည့် မော်လမြိုင်ခရိုင်အုပ်ချုပ်ရေးမှူးဟောင်း ဦးမြတ်ယု မှာ မော်လမြိုင်မြို့နယ်အတွင်းရှိ တန်ဖိုးမြင့် မြေကွက်များကိုလည်း ၎င်း၏ ဇနီးအမည်ဖြင့် ဂရံအေမည်ဖောက်ကာ ရယူသွားသည်ဟူသည့် သတင်းများလည်း ထွက်ပေါ်လျှက်ရှိသည်။
ဦးမြတ်ယု ၏ ဇနီးအမည်ဖြင့် ဂရံအမည်ဖောက်ယူသွားသည့် မြေကွက်များထဲတွင် ဗိုလ်ချုပ်မှူးကြီးဟောင်း ဦးသန်းရွှေ၏ ဇနီးဖြစ်သူ ဒေါ်ကြိုင်ကြိုင် ၏ အမည်ပေါက်ထွက်နေသည့် မော်လမြိုင်မြို့၊ မန္တလေးရပ်ကွက်ရှိ မြေကွက် နှင့် ယခုလက်ရှိ မုပွန်ရပ်ကွက်ရှိ မော်လမြိုင်ငါးဈေးအသစ်တည်ဆောက်နေသောနေရာအနီးမှ မြေကွက်များ ပါဝင်သည်ဟု သတင်းများထွက်ပေါ်နေသည်။
ထို့အပြင် မော်လမြိုင်မြို့၊ မြိုင်သာယာရပ်ကွက်အတွင်း ဦးမြတ်ယု ၏ ဇနီးဖြစ်သူ၏အမည်ဖြင့် ရယူထားသည့် မြေကွက်အား ယခုအခါ ငွေကျပ်သိန်းသုံးသောင်းကျော်ဖြင့် ရောင်းချရန် ဈေးခေါ်ထားကြောင်းလည်း မော်လမြိုင်မြို့ရှိ အိမ်/ခြံ/မြေ အရောင်းအဝယ်ပြုလုပ်သူများထံမှ သိရသည်။
“ဦးမြတ်ယု က နုတ်ထွက်စာတင်ပြီးတဲ့နောက်ပိုင်းမှာ မော်လမြိုင်မြို့နယ်မြေစာရင်းရုံးကိုနေ့တိုင်းနီးပါလာပြီးတော့ မော်လမြိုင်ခရိုင်အုပ်ချုပ်ရေးမှူးအဖြစ်သူတာဝန်ယူစဉ်ကာလက သူ့မိန်းမအမည်နဲ့ ယူထားတဲ့ မြေကိစ္စတွေအတွက် ဂရံအမည်ပေါက်တွေလုပ်သွားတာလို့ မြေစာရင်းရုံးက ဝန်ထမ်းတွေပြောကြလို့ သိရတယ်” ဟု မော်လမြိုင်မြို့နယ် မြေစာရင်းရုံးနှင့် နီးစပ်သူတစ်ဦးက ပြောကြားသည်။
ဦးမြတ်ယု မှာ မော်လမြိုင်ခရိုင်အုပ်ချုပ်ရေးမှူးအဖြစ် တာဝန်ထမ်းဆောင်နေစဉ်ကာလအတွင်းက စစ်ကောင်စီလက်အောက်ခံ စစ်သင်္ဘောမှ လက်နက်ကြီးဖြင့် ပစ်ခတ်မှုကြောင့် မီးလောင်ကျွမ်းမှုဖြစ်ပွားခဲ့သည့် ကျိုက်မရောမြို့နယ် ဓမ္မသကျေးရွာသို့ (၂) ကြိမ်သွားရောက်စဉ်၊ တော်လှန်ရေးအဖွဲ့များမှ ဒရုန်းဖြင့် ဗုံးချတိုက်ခိုက်ခြင်းကိုလည်း (၂) ကြိမ်လုံးခံခဲ့ရသူတစ်ဦးဖြစ်သည်။
လက်ရှိတွင် မော်လမြိုင်ခရိုင်အုပ်ချုပ်ရေးမှူးတာဝန်အား မကွေးတိုင်းဒေသကြီးမှ ပြောင်းရွှေ့လာသည့် ဦးထွန်းဝေ ဆိုသူမှ တာဝန်ထမ်းဆောင်လျှက်ရှိကြောင်း သိရသည်။
Photo- မော်လမြိုင်ခရိုင်အုပ်ချုပ်ရေးမှူးဟောင်း ဦးမြတ်ယု
