ရေးခရိုင်အတွင်း ၂၀၂၂ ခုနှစ်က စတင်ကောင်အထည်ဖော်နေသည့် မဟာဓာတ်အားလိုင်းစီမံကိန်းကို ခေတ္တရပ်နားဖွယ်ရှိကြောင်း သိရသည်။
သံဖြူဇရပ်မြို့နယ်မှ ရေးမြို့နယ်သို့ 66 KV မဟာဓာတ်အားလိုင်း ဓာတ်ကြိုးသွယ်တန်းခြင်းလုပ်ငန်းကို ဆောင်ရွက်နေခြင်းဖြစ်ပြီး လုံခြုံရေးစိတ်မချရခြင်းကြောင့် ခေတ္တရပ်နားမည်ဖြစ်ကြောင်း လျှပ်စစ်ဓာတ်အားပို့လွှတ်ရေးဦးစီးဌာနမှ စုံစမ်းသိရှိရသည်။
” သံဖြူဇရပ်-ရေး ၅၄.၇၈ မိုင်ပေါ့ ဦးစီးဌာနနဲ့ ပုဂ္ဂလိကကုမ္ပဏီတို့ ဆောင်ရွက်နေတာပါ၊ လိုင်းအူကြောင်းတစ်လျှောက် လုံခြုံရေးစိတ်ချရတဲ့မြို့နဲ့ နီးတဲ့နေရာတွေမှာတော့ တိုင်တွေလုပ်ပြီးပြီ၊ လက်ရှိလုံခြုံရေး အခြေအနေအရတော့ ခေတ္တရပ်နားဖို့ရှိပါတယ်၊ ခွဲရုံကိစ္စတွေ၊ ဖောက်လုပ်မယ့်နေရာမှာပါတယ်၊ ဒေသတာဝန်ရှိသူတွေနဲ့ ညှိနှိုင်းတာတွေလည်း ဆောင်ရွက်ပြီးပါပြီ ” ဟု အဆိုပါဦးစီးဌာနမှ ဝန်ထမ်းတစ်ဦးက ပြောကြားသည်။
ရေးခရိုင်အနေဖြင့် မွန်ပြည်နယ်၏ တစ်ခုတည်းသော မဟာဓာတ်အားမရရှိသေးသည့် တစ်ခုတည်းသောခရိုင်ဖြစ်ပြီး ပုဂ္ဂလိကလျှပ်စစ်မီးကိုအသုံးပြုလျက်ရှိရာ တစ်ယူနစ်လျှင် ငွေကျပ် ၂၁၀၀ မှ ၂၅၀၀ အထိ ပေးဆောင်နေရသည်။
“ရေးမြို့နယ်က ဒေသထွက်ကုန်တွေနဲ့ပတ်သက်လို့ အခွန်တွေပေးသွင်းနေရတာ အတော်များပါတယ်၊ အကျိုးခံစားမှုက လျှပ်စစ်နဲ့ပတ်သက်လို့ ဘာမှမရခဲ့ဘူး၊ ခုလည်း ကိုဗစ်ကြောင့် နောက်ဆုတ်ရပြန်ပြီ၊ သူများတွေ လျှပ်စစ်အလကားရနေချိန်မှလည်း ခံစားခွင့်မရှိခဲ့တဲ့မြို့နယ်ပါ၊ နောက်တစ်ခုက လျှပ်စစ်ဌာနအနေနဲ့ ပုဂ္ဂလိကမီးလင်းရေးက ပြည်သူတွေသုံးစွဲလိုက်တဲ့မီတာအလိုက် ကျသင့်ငွေကို အစိုးရဈေးအလိုက် လျှပ်စစ်ဌာနကိုလည်း ပေးသွင်းရတယ်၊ ဒါတွေကို မဟာဓာတ်အားလိုင်းမရခင်မှာ ဖြေလျှော့ပေးသင့်တယ်” ဟု လမိုင်းမြို့နေ ရပ်မိရပ်ဖတစ်ဦးကပြောကြားသည်။
မဟာဓာတ်အားလိုင်းစနစ် တိုးချဲ့ရေးစီမံကိန်းများအတွက် ယခု (၂၀၂၄-၂၀၂၅) ဘဏ္ဍာနှစ်၌ ကျပ် ဘီလျံ(၂၀ဝ)ကျော် သုံးစွဲရန် လျာထားကြောင်း သတင်းရရှိသည်။
လက်ရှိတွင် မြန်မာတစ်နိုင်ငံလုံး၌ မဟာဓာတ်အားလိုင်းဓာတ်အားစနစ်ဖြင့် မီးလင်းရန်ကျန်ရှိနေသည့် မြို့ပေါင်းမှာ (၁၀၈)မြို့ရှိပြီး ယခုဘဏ္ဍာနှစ်တွင် မဟာဓာတ်အားလိုင်းစနစ်တိုးချဲ့ရေး စီမံကိန်းများကို လုပ်ဆောင်ရန် ကျပ်ဘီလျံ ၂၀ဝ ကျော်သုံးစွဲရန်လျာထားပြီးကြောင်း လျှပ်စစ်စွမ်းအားဝန်ကြီးဌာနထုတ်ပြန်ချက်အရ သိရှိရသည်။
