🇲🇲🇹🇭မြန်မာနယ်စပ်မှ ထိုင်းနိုင်ငံသို့ တရားမဝင်နည်းလမ်းဖြင့် ဝင်ရောက်လာသော တရုတ် ၄ ဦးနှင့် မြန်မာ ၄ ဦးတို့ကို ထောင်ဖာပွန်မရောက်မီတွင် ဖမ်းဆီးမိ

မြန်မာနယ်စပ် စံခလပူရီမှ သီးသန့်မော်တော်ကားတစ်စီးဖြင့် ထိုင်းနိုင်ငံသို့ တရားမဝင်နည်းလမ်းဖြင့် ဝင်ရောက်လာသော တရုတ်နိုင်ငံသား ၄ ဦးနှင့် မြန်မာနိုင်ငံသား ၄ ဦးတို့ကို ထောင်ဖာပွန်မရောက်မီတွင် ဖမ်းဆီးမိကြောင်း ထိုင်းသတင်းများက ဖော်ပြသည်။

ထိုင်းနိုင်ငံ ၁၀ နှစ်ကတ်ပြားကိုင်ဆောင်သူ မောင်းနှင်လာသည့် အဖြူရောင် Toyota Fortuner အမျိုးအစား မော်တော်ယာဥ်အမှတ် Kor 7503, Kanchanaburi လိုင်စင်ဖြင့် မော်တော်ယာဥ်ပေါ်ပါလာသူ ၉ ဦးစလုံးကို သြဂုတ် (၁) ရက်က ထောင်ဖာဖွန်မြို့နယ် ကရိန်ကဝီး Kering Kawia / ရွာအမှတ် 4 ဂိတ်၌ ထိုင်းအာဏာပိုင်တို့ ဖမ်းဆီးရမိကြောင်း ကန်ချနပူရီဒေသတွင်း ထိုင်းဘာသာဖြင့် သတင်းတွင် ရေးသားဖော်ပြသည်။

ထိုင်းဘာသာဖြင့် သတင်းဖော်ပြချက်အရ တရုတ်နိုင်ငံသားများဖြစ်ကြသော မစ္စတာ Wu Shenghua အသက် ၃၂ နှစ်၊ မစ္စတာ Chenfeng အသက် ၂၃ နှစ်၊ မစ္စတာ Tang Huihua အသက် ၂၁ နှစ်၊ မစ္စတာ Lan Xiaocharin အသက် ၂၂ နှစ်ဖြစ်ပြီး မြန်မာနိုင်ငံသားများမှာ အသက် ၁၉ မှ ၂၉ နှစ်အထိ လူငယ်များဖြစ်ကြောင်း သိရသည်။

ကားမောင်းသမားအပါအဝင် ဖမ်းဆီးရမိခဲ့သော မော်တော်ယာဥ်ပေါ်လိုက်ပါလာသူ ၉ ဦးတို့မှာ အမျိုးသားများဖြစ်ကြပြီး မြန်မာနိုင်ငံဘက်အခြမ်း ဘုရားသုံးဆူဒေသမှ တရားမဝင် ဝင်ရောက်လာသူများဖြစ်ကြောင်း အမည်မဖော်လိုသော ထိုင်းလုံခြုံရေးအာဏာပိုင်အဖွဲ့အစည်းနှင့် နီးစပ်သူတစ်ဦးက ပြောသည်။

ကရင်ပြည်နယ် မြဝတီမြို့နယ်အတွင်းရှိ ကျားဖြန့် တရုတ်ငွေလိမ်လုပ်ငန်းများအားလုံး အမြန်ဆုံးထွက်ခွာသွားရန် ကရင် နယ်ခြား စောင့် တပ်-BGF က သတိပေးထုတ်ပြန်လိုက်ပြီးနောက် ယခုအခါ ဘုရားသုံးဆူမြို့ဘက်ကို တရုတ်နိုင်ငံသားများက နယ်မြေခံ လက်နက်ကိုင်အဖွဲ့အစည်းအချို့၏ အကူအညီဖြင့် ဝင်ရောက်မှုများရှိလာနေကြောင်း သတင်းများက ဖော်ပြလျှက်ရှိသည်။