သံဖြူဇရပ်မြို့နယ် အနင်းကျေးရွာအတွင်း ယမန်နေ့ မွန်းလွဲပိုင်းအချိန်က လေဆင်နှာမောင်းတိုက်ခတ်မှုကြောင့် နေအိမ် (၁၅၀) ခန့် အမိုးလန်ပျက်စီးခြင်း၊ အပင်များနှင့် ဓါတ်တိုင်များကျိုးပဲ့ပျက်ဆီးခြင်းအပြင် ဒေသခံ (၃) ဦးထက်မနည်း ထိခိုက်ဒဏ်ရာရရှိခဲ့ကြောင်း ဒေသခံများထံမှ သိရသည်။
ဇူလိုင်လ (၂၆) ရက်နေ့ မွန်းလွဲ (၃) နာရီအချိန်ခန့်က အဆိုပါ အနင်းကျေးရွာအတွင်း လေဆင်နှာမောင်း တိုက်ခိုက်ခဲ့ခြင်းဖြစ်ကြောင်း ဒေသခံတစ်ဦးက ပြောကြားသည်။
“အိမ်ခြေ (၁၄၀) လောက်က အိမ်အမိုးတွေလန်ကုန်တယ်။ အမိုးဒိုင်းတွေပျက်စီးကုန်တဲ့ အိမ်တွေလည်းရှိတယ်။ တဲအိမ် (၁၀) လုံးလောက်ကတော့ လုံးဝပျက်စီးသွားတယ်။ နောက်ပြီး အပင်တွေလည်း လဲကုန်တယ်။ ဓါတ်မီးတိုင်တွေလည်း ကျိုးကုန်တယ်။ ရွာသား (၃) ယောက်လည်း ထိခိုက်ဒဏ်ရာတွေရသွားတယ်။
သူတို့ကို လူမှုကူညီကယ်ဆယ်ရေးအဖွဲ့တွေက မော်လမြိုင်မြို့မှာရှိတဲ့ ပြည်သူ့ဆေးရုံကြီးကို ပို့ဆောင်ပေးထားကြပါတယ်” ဟု ၎င်းဒေသခံက ဆက်လက်ပြောကြားသည်။
လတ်တလောတွင် သက်ဆိုင်ရာမှ နေအိမ်ပျက်စီးမှု စာရင်းကောက်ယူလျှက်ရှိကြောင်း ၎င်းဒေသခံက ဆိုသည်။
ဇူလိုင်လ တတိယအပတ်မှစတင်ကာ မိုးဆက်တိုက်ရွာသွန်းနေမှုကြောင့် မွန်ပြည်နယ်အတွင်းရှိ ဒေသအတော်များများတွင် ရေကြီးရေလျှံမှုများဖြစ်ပေါ်နေသည့်အပြင် လေပြင်းတိုက်ခတ်ခြင်းများကြောင့် နေအိမ်များပျက်စီးခြင်း၊ အပင်များလဲပြိုခြင်းများလည်း ဖြစ်ပွားနေကြောင်း သိရသည်။
