မြန်မာရေတပ်အမြှောက်ပစ်ခတ်မှုကြောင့် မီးလောင်ပျက်စီးသွားခဲ့သော ကျိုက်မရောမြို့နယ် ဓမ္မသကျေးရွာရှိ နေအိမ်များပြန်လည်တည်ဆောက်ရေးအတွက် စစ်ကောင်စီမှ မွန်စစ်ဘေးရှောင်ကူညီရေးအဖွဲ့ Mon Humanitarian Support Alliance အား ယမန်နေ့က အလှူငွေထောက်ပံ့ပေးအပ်ခဲ့ရာတွင် စစ်ဘေးရှောင်များလည်း တက်ရောက်ခဲ့ကြောင်း သတင်းရရှိသည်။
အဆိုပါ အလှူငွေပေးအပ်ပွဲအခမ်းအနားကို ယမန်နေ့ (ဇူလိုင်လ ၂၅) မွန်းလွဲ ၁ နာရီခွဲအချိန်က မော်လမြိုင်မြို့၊ သာသနာ၂၅၀၀ သာသနာ့ဗိမာန်တော် မွန်ဓမ္မာရုံ၌ ပြုလုပ်ခဲ့ရာ မွန်စစ်ဘေးရှောင်ကူညီရေးအဖွဲ့ Mon Humanitarian Support Alliance မှ ဆရာတော်ဘဒ္ဓန္တကေတုမာလာ အမှူးပြုသော မွန်သံဃာတော်များ၊ မွန်ပြည်သစ်ပါတီ NMSP, မွန်ညီညွတ်ရေးပါတီ MUP, မွန်အရပ်ဖက်လူမှုအဖွဲ့အစည်းများနှင့် ဓမ္မသစစ်ဘေးရှောင်များ တက်ရောက်ခဲ့ကြပြီး စစ်ကောင်စီ မွန်ပြည်နယ်အစိုးရအဖွဲ့ ဝန်ကြီးချုပ် ဦးအောင်ကြည်သိန်းနှင့် အစိုးရအဖွဲ့ဝင်ဝန်ကြီးများက အလှူငွေနှင့် ထောက်ပံ့ရေးပစ္စည်များကို ပေးအပ်ခဲ့သည်။
စစ်ကောင်စီ မွန်ပြည်နယ်အစိုးရအဖွဲ့၊ နယ်စပ်ရေးရာဝန်ကြီးဌာန၊ လူမှုဝန်ထမ်း ကယ်ဆယ်ရေးနှင့် ပြန်လည် နေရာချထားရေးဝန်ကြီးဌာန ဘေးအန္တရာယ် စီမံခန့်ခွဲရေးဦးစီးဌာနတို့မှ ပေးအပ်လှူဒါန်းခဲ့သော ထောက်ပံ့ငွေများတွင် မီးလောင်ခံထားရသည့် နေအိမ်ပေါင်း ၃၈၀ အတွက် မိသားတစ်စုလျင် ၁၂ သိန်းကျပ်၊ အမျိုးအစား ၁၆ မျိုးပါ ကယ်ဆယ်ရေးပစ္စည်းပုံး ၃၈၀ (တန်ဖိုး ၁၇ သန်းကျော်) အိမ်ဆောက်ပစ္စည်းအမျိုးမျိုးအတွက် သွပ်ဖိုးအလှူရှင်များမှ ၁၂၂၀ သိန်းတို့ကို ထောက်ပံ့လှူဒါန်းပေးအပ်ခဲ့သည်။
စစ်ကောင်စီ မွန်ပြည်နယ်အစိုးရ မွန်ပြည်နယ်ဝန်ကြီးချုပ် ဦးအောင်ကြည်သိန်းက ဆရာတော် ဘဒ္ဓန္တကေတုမာလာ ထံသို့လည်းကောင်း၊ နယ်စပ်ရေးရာဝန်ကြီးဌာနမှ ဒုတိယဝန်ကြီး ဗိုလ်ချုပ် ဖြိုးသန့်က နိုင်အောင်မငေး (NMSP) ထံသို့လည်းကောင်း၊ မွန်ပြည်နယ် လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး ကျော်စွာမြင့်က နိုင်တလညီ (MUP) ထံသို့လည်းကောင်း အလှူငွေများ အသီးသီး ပေးအပ်လှူဒါန်းခဲ့သည်။
ပြီးခဲ့သည့် မတ်လ (၂၅) ရက်နေ့က မွန်ပြည်သစ်ပါတီ (စစ်အာဏာရှင်တိုက်ဖျက်ရေးအဖွဲ့) NMSP (AD), MLA တပ်ဖွဲ့၊ KNLA နှင့် PDF တပ်ဖွဲ့များက ကော့ဘိန်းရဲစခန်းကို တိုက်ခိုက်သိမ်းပိုက်လိုက်ပြီးနောက် မတ်လ (၂၇) ရက်နေ့တွင် ဂျိုင်းမြစ်အတွင်းမှ မြန်မာရေတပ်သဘေႅာက ဓမ္မသကျေးရွာအတွင်းသို့ အမြှောက်ဖြင့် ပစ်သွင်းခဲ့ရာမှ နေအိမ်များ မီးလောင်သွားခဲ့ပြီး အိမ်ခြေတစ်ထောင်ကျော်ရှိ ဓမ္မသရွာသားအားလုံးမှာ စစ်ဘေးရှောင်အဖြစ် ဘေးလွတ်ရာသို့ ထွက်ပြေးခဲ့ရကြောင်း ကနဦးသတင်းများက ဖော်ပြခဲ့သည်။
