💥ကျိုက်ထိုမြို့နယ် ပျဉ်းကတိုးကုန်းကျေးရွာအတွင်း စစ်ကောင်စီတပ်မှ ပစ်ခတ်လိုက်သည့် လက်နက်ကြီးကြောင့် ဒေသခံပြည်သူ (၈) ဦးသေဆုံး (၅) ဦးထက်မနည်း ထိခိုက်ဒဏ်ရာရရှိ

ကျိုက်ထိုမြို့နယ် ပျဉ်းကတိုးကုန်းကျေးရွာအတွင်း ဇူလိုင်လ (၂၃) ရက်နေ့ နံနက်ပိုင်းအချိန်က စစ်ကောင်စီတပ်မှ ပစ်ခတ်လိုက်သည့် လက်နက်ကြီးကျည်များ ကျရောက်ပေါက်ကွဲမှုကြောင့် ဒေသခံပြည်သူ (၈) ဦးသေဆုံးခဲ့ကာ (၅) ဦးထက်မနည်း ထိခိုက်ဒဏ်ရာရရှိခဲ့ကြောင်း ဒေသခံများထံမှ သိရသည်။

ဇူလိုင်လ (၂၃) ရက်နေ့ နံနက် (၉) နာရီခွဲအချိန်ခန့်က ပျဉ်းကတိုးကုန်းကျေးရွာအုပ်စုအတွင်း စစ်ကောင်စီတပ် နှင့် တော်လှန်ရေးပူးပေါင်းတပ်ဖွဲ့များအကြား တိုက်ပွဲဖြစ်ပွားခဲ့ပြီးနောက်၊ စစ်ကောင်စီလက်အောက်ခံ အမတ – ၃၁၀ အမြောက်တပ်မှ ကျိုက်ထိုမြို့နယ် ပျဉ်းကတိုးကုန်းကျေးရွာအတွင်းသို့ လက်နက်ကြီးဖြင့် ပစ်ခတ်ခဲ့ခြင်းဖြစ်ကြောင်း ဒေသခံတစ်ဦးက ပြောကြားသည်။

“လက်နက်ကြီးကျည်တွေက ရွာအနီးမှာလည်းကျတယ်။ ရွာထဲမှာလည်းကျတယ်။ နောက် လုပ်ငန်းခွင်တွေထဲကိုလည်း ကျရောက်ပေါက်ကွဲလို့ လူထိခိုက်သေဆုံးမှုများသွားတာပါ”

ပျဉ်းကတိုးကုန်းကျေးရွာအတွင်းလက်နက်ကြီးကျည်များကျရောက်ပေါက်ကွဲမှုကြောင့် အသက် (၁၈) နှစ်အရွယ် ယောက်ျားလေး (၂) ဦးအပါအဝင် အမျိုးသား (၇) ဦးနှင့် အမျိုးသမီး (၁) ဦး သေဆုံးခဲ့ပြီး၊ (၅) ဦးထက်မနည်း ထိခိုက်ဒဏ်ရာများရရှိခဲ့ကြောင်း ၎င်းဒေသခံက ဆိုသည်။

ကျိုက်ထိုမြို့နယ်အတွင်း တော်လှန်ရေးပူးပေါင်းတပ်ဖွဲ့များ သွားလာလှုပ်ရှားတတ်နေသည့်နေရာများအား စစ်ကောင်စီတပ်ဘက်မှ တိုက်ပွဲများမရှိသော်လည်း လက်နက်ကြီးဖြင့် အကြောင်းမဲ့ပစ်ခတ်နေလေ့ရှိရာ၊ ဒေသခံအရပ်သားပြည်သူများနေထိုင်ရာကျေးရွာများအတွင်းသို့ လက်နက်ကြီးကျည်များကျရောက်ပေါက်မှုများခဲ့ပြီး အရပ်သား ထိခိုက်သေဆုံးမှုများရှိနေသည့်အပြင်၊ ဒေသခံပြည်သူများအနေဖြင့်လည်း နေရပ်စွန့်ခွာက ထွက်ပြေးတိမ်းရှောင်နေကြရကြောင်း သိရသည်။

ပြီးခဲ့သည့် ဇူလိုင်လ (၂၂) ရက်နေ့ကလည်း ကျိုက်ထိုမြို့နယ် သိမ်ဇရပ်မြို့ရှိ နယ်မြေရဲစခန်းအား တော်လှန်ရေးပူးပေါင်းအဖွဲ့မှ သွားရောက်တိုက်ခိုက်ခဲ့ပြီးနောက် စစ်ကောင်စီတပ်ဘက်က လက်နက်ကြီးဖြင့် ရမ်းသစ်ပစ်ခတ်မှုကြောင့် သိမ်ဇရပ်မြို့၊ ရွာလေးပိုင်းနေ ဒေသခံအရပ်သားတစ်ဦးသေဆုံးကာ၊ နှစ်ဦးထိခိုက်ဒဏ်ရာရရှိခဲ့သေးကြောင်း သိရသည်။