ရှမ်းပြည်နယ်နှင့် မန္တလေးတိုင်းတို့တွင် TNLA၊ MNDAA နှင့် PDF တပ်ဖွဲ့တို့၏ ၁၀၂၇ စစ်ဆင်ရေး ဒုတိယပိုင်း ကာလအတွင်း အရပ်သားများ ရာနှင့်ချီ၍ သေဆုံးခဲ့ကြောင်း သိရသည်။
လူနေရပ်ကွက်မြို့ပေါ်တွင် ဖြစ်ပွားခဲ့သော တိုက်ပွဲများအကြား အရပ်သားသေဆုံးမှုများကို စစ်ကောင်စီနှင့် တော်လှန်ရေးအဖွဲ့များအကြား တဖက်နှင့်တဖက် အပြန်အလှန် စွပ်စွဲပြောဆိုမှုများ ရှိနေပြီး အဆိုပါ ရှမ်း-မန်း စစ်ဆင်ရေးဟု နာမည်ပေးထားသော ၁၀၂၇ စစ်ဆင်ရေး ဒုတိယပိုင်းကာလအတွင်း တိုက်ပွဲများက ဆက်လက်ပြင်းထန်လျက်ရှိရာ အရပ်သားများသေဆုံးမှုသည်လည်း တစ်နေ့ထက်တစ်နေ့ အရေအတွက် တိုးများလာနေသည်ဟု စောင့်ကြည့်လေလာသူများက ဆိုသည်။
ဇွန်လ ၂၅ ရက်မှ ဇူလိုင်လ ၂၂ ရက်နေ့အထိ တိုက်ပွဲ ၂၈ ရက်အတွင်း စစ်ကောင်စီ၏ လက်နက်ကြီးနှင့် လေကြောင်းတိုက်ခိုက်မှုကြောင့် အရပ်သားသေဆုံးသူ ၁၀၉ ဦးအထိရှိလာပြီး ၁၃၆ ဦးအထိ ဒဏ်ရာရရှိထားကြောင်း TNLA က သတင်းထုတ်ပြန်ထားသည်။
အလားတူ ရှမ်းပြည်မြောက်ပိုင်း နောင်ချိုမြို့၊ကျောက်မဲမြို့နှင့်သီပေါမြို့များရှိ တရုတ်သဘာ၀ဓာတ်ငွေ့ပိုက်လိုင်း တလျောက်တွင် ဇွန်လ ၁၉ ရက်နေ့မှ ဇူလိုင်လ ၄ ရက်နေ့အထိ နှစ်ပတ်တာကာလအတွင်း စစ်ကောင်စီ၏ လေကြောင်းတိုက်ခိုက်မှုနှင့် လက်နက်ကြီးပစ်ခတ်မှုများကြောင့် အရပ်သား ၄၆ ဦး သေဆုံးပြီး ၃၅ ဦးဒဏ်ရာရကာ အဆောက်အဦး ၁၅၀ ကျော်ပျက်စီးခဲ့ကြောင်း ရှမ်းလူ့အခွင့်အရေးမဏ္ဍိုင်အဖွဲ့ Shan Human Rights Foundation- SHRF မှ ယမန်နေ့က သတင်းထုတ်ပြန်သည်။
စစ်ကောင်စီသည် တရုတ်ရေနံနှင့်သဘာဓာတ်ငွေ့ပိုက်လိုင်းတစ်လျှောက်ရှိမြို့များတွင် သေဆုံးထိခိုက်မှုများစေသော ပေါင် ၅၀၀ ဗုံးများအသုံးပြုခြင်းအပါအ၀င် အမြောက်နှင့် လေကြောင်းတိုက်ခိုက်မှုများကို မြို့များနှင့်ရွာများအပေါ် ပိုမိုပစ်မှတ်ထားလုပ်ဆောင်ခဲ့သည်ဟု SHRF က ထုတ်ပြန်သည်။
လက်ရှိတွင် စစ်ကောင်စီ၏ တိုင်းစစ်ဌာနချုပ် ၁၄ ခု ရှိသည့်အနက် ၁၀ ခုတွင် လက်နက်ကိုင်တိုက်ပွဲများ ပြင်းထန်နေပြီး မြို့နယ်ပေါင်း ၃၃၀ ရှိသည့်အနက် မြို့နယ် ၂၃၀ ကျော်တွင် လက်နက်ကိုင်ပဋိပက္ခများ ဆက်လက်ဖြစ်ပေါ်လျှက် ရှိသည်။
Photo-ရှမ်းလူ့အခွင့်အရေးမဏ္ဍိုင်အဖွဲ့ SHRF
