💥သိမ်ဇရပ်မြို့ ရွာလေးပိုင်းအတွင်း လက်နက်ကြီးကျရောက်ပေါက်ကွဲမှုကြောင့် အရပ်သားပြည်သူတစ်ဦး သေဆုံးကာ နှစ်ဦး ထိခိုက်ဒဏ်ရာရရှိ

ကျိုက်ထိုမြို့နယ် သိမ်ဇရပ်မြို့၊ ရွာလေးပိုင်းအတွင်း ယမန့်နေ့ ဇူလိုင်လ (၂၂) ရက်နေ့ မွန်းလွဲပိုင်းအချိန်က လက်နက်ကြီးကျည်ကျရောက်ပေါက်ကွဲမှုကြောင့် အရပ်သားပြည်သူတစ်ဦး သေဆုံးကာ၊ နှစ်ဦး ထိခိုက်ဒဏ်ရာရရှိခဲ့ကြောင်း ဒေသခံများထံမှ သိရသည်။

ဒေသခံတစ်ဦးက “လက်နက်ကြီးကျည် (၁) လုံးက ဦးကိုလင်း ဆိုသူရဲ့နေအိမ်အနီးမှာကျရောက်ပေါက်ကွဲခဲ့လို့ ဦးကိုလင်း က အခင်းဖြစ်တဲ့နေရာမှာဘဲ သေဆုံးခဲ့ရပါတယ်။ နောက်ပြီး သူ့ဇနီးဖြစ်တဲ့ ဒေါ်ကြည်ကြည်ဝင်း ဆိုသူနဲ့ အိမ်နီးချင်းဖြစ်တဲ့ ဒေါ်ရင်ဝေလွင် တို့မှာလည်း လက်နက်ကြီးကျည်စထိမှန်ဒဏ်ရာတွေရရှိခဲ့ပါတယ်” ဟု ဆိုသည်။

သို့ရာတွင် KNU/PDF များမှ ရွာလေးကျေးရွာအတွင်းသိုး ၃၀ မမဗုံးသီး (၃) လုံး ပစ်ထည့်ခဲ့ကြောင်း၊ ရွာလမ်းမပေါ် (၂) လုံးနှင့် ဦးကိုလင်း နေအိမ်အနီး (၁) လုံး ကျရောက်ပေါက်ကွဲခဲ့ကြောင်း စစ်ကောင်စီလော်ဘီတယ်လီဒရမ်တွင် ရေးသားထားသည်။

ထိုဖြစ်စဉ် မဖြစ်ပွားခင် သိမ်ဇရပ်မြို့ရှိ နယ်မြေရဲစခန်းအား တော်လှန်ရေးပူးပေါင်းအဖွဲ့မှ ၄၀ – မမ လက်နက်ကြီးဖြင့် သွားရောက်ပစ်ခတ်တိုက်ခိုက်ခြင်းများပြုလုပ်ခဲ့ကြောင်းလည်း ဒေသခံများထံမှ သိရသည်။

ပြီးခဲ့သည့် ဇူလိုင်လ (၁၆) ရက်နေ့ ည (၈) နာရီအချိန်ခန့်ကလည်း အဆိုပါ သိမ်ဇရပ်မြို့၊ ရွာလေးပိုင်းရှိ ဦးမျိုးမင်းဦး ဆိုသူပိုင်ဆိုင်သော သစ်စက်အလုပ်ရုံပေါ်သို့ လက်နက်ကြီးကျည် ကျရောက်ပေါက်ကွဲခဲ့ခြင်းဖြစ်ကြောင်း နှင့် လက်နက်ကြီးကျည်ပေါက်ကွဲမှုကြောင့် သစ်စက်အလုပ်သမား (၂) ဦး ထိခိုက်ဒဏ်ရာများရရှိခဲ့ကြောင်း ဒေသခံများ၏ ပြောကြားချက်များအရ သိရသည်။