မော်လမြိုင်မြို့၊ ပြည်နယ်လျှပ်စစ်ဦးစီးဌာနရုံးရှိ မီတာခပေးသွင်းရသည့်ကောင်တာတွင် ဝန်ထမ်းများ၏ စီမံခန့်ခွဲမှုညံ့ဖျင်းမှုကြောင့် မီတာခလာသွင်းကြသည့်ပြည်သူများ မီတာဖြတ်ပိုင်းရရှိရန် နာရီနှင့်ချီပြီး အသီးသီးစောင့်ဆိုင်းနေကြရကြောင်း မြို့ခံပြည်သူများ၏ ပြောကြးချက်များအရ သိရသည်။
မီတာခကျသင့်ငွေပေးသွင်းပြီးပါက ဝန်ထမ်းများမှာ မီတာခဖြတ်ပိုင်း ချက်ချင်းပြန်လည်မပေးဘဲ စောင့်ခိုင်းထားသည့်အတွက် နာရီနှင့်ချီပြီးစောင့်ဆိုင်းနေကြရကြောင်း မော်လမြိုင်မြို့ခံ အမျိုးသမီးတစ်ဦးက ပြောကြားသည်။
“လူတွေက အားကြတာမဟုတ်ဘူး။ မီတာခလာသွင်းသူတွေထဲမှာ ဈေးသမားတွေ၊ ရုံးသမားတွေ၊ ဝန်ထမ်းတွေရော၊ ကုမ္ပဏီကဝန်ထမ်းတွေရောလူစုံဘဲ။ ရတဲ့အချိန်လေးမှာ မီတာခလာဆောင်ကြတာ။ အခုတော့ မီတာခပေးသွင်းပြီးလည်း မီတာဖြတ်ပိုင်းကမရဘူး။ စောင့်ခိုင်းထားတယ်။ စောင့်နေရာ အချိန် (၂) နာရီကျော်နေပြီး” ဟု ၎င်းအမျိုးသမီးက ပြောသည်။
ထို့အပြင် မီတာခတောင်းခံလွှာလာပေးသည့်မှာလည်း ပေးသွင်းရမည့်နောက်ဆုံးရက်လွန်မှ လျှပ်စစ်ဝန်ထမ်းများမှ လာပေးကြသည့်အတွက် ဒဏ်ကြေးပေးဆောင်နေကြရကြောင်းလည်း မြို့ခံပြည်သူများက ဆိုကြသည်။
“မီတာစာရွက်ကို ဇူလိုင်လ (၂၂) ရက်နေ့မှလာပေးတယ်။ မီတာတောင်းခံလွှာထဲမှာ ဇူလိုင်လ (၂၀) ရက်နေ့ နောက်ဆုံးပေးသွင်းရန်ဆိုပြီးရေးထားတော့ နေရင်းထိုင်ရင်းနဲ့ ဒဏ်ကြေး (၂၀၀၀) ကျပ်ပေးခဲ့ရတယ်” ဟု မော်လမြိုင်မြို့ခံ အမျိုးသားတစ်ဦးက ပြောကြားသည်။
၎င်းအပြင် မီတာခကြွေးကျန်သည့် မီတာများကိုလည်း ယခုလအတွင်း အပြီး မီတာခများပေးဆောင်ရမည်ဖြစ်ပြီး ပြည်သူများအနေဖြင့် ငွေကျပ်သိန်းနှင့်ချီကာ မီတာခများပေးဆောင်ရမည်ဖြစ်သည့်အတွက်ကြောင့် အခက်အခဲများနှင့်ကြုံတွေ့နေကြရကြောင်းလည်း မြို့ခံပြည်သူများက ပြောကြားသည်။
