မြန်မာကျပ်ငွေတန်ဖိုး စံချိန်တင်ကျဆင်းနေခြင်းကြောင့် ထိုင်းနိုင်ငံမှ ထုတ်ကုန်များ ဈေးနှစ်ဆကျော်မြင့်တက်သွားကြောင်း ထိုင်း – မြန်မာ နယ်စပ် မြဝတီမြို့ရှိ ကုန်သည်များ၏ ပြောကြားချက်များအရ သိရသည်။
၂၀၂၄ ဇန်နဝါရီ ၁ ရက်နေ့က ထိုင်း ၁ ဘတ်ကို မြန်မာငွေ ၉၉ ဒဿမ ၅၀ ကျပ်ရှိခဲ့ရာမှ ၆ လကြာမြင့်သည့် ဇွန်လ ၃၀ ရက်နေ့တွင် ၁၂၄ ဒဿမ ၂၂ ကျပ်သို့လည်းကောင်း၊ ယနေ့ ဇူလိုင် ၂၂ ရက်နေ့တွင် မြန်မာငွေ ၁၃၃ ဒဿမ ၃၀ ကျပ်အထိလည်းကောင်း စံချိန်တင် ကျဆင်းသွားကြောင်း တွေ့ရသည်။
မြဝတီမြို့မှ ကုန်သည်တစ်ဦးက “ဘတ်ငွေပေါက်ဈေးက မြင့်သွားတာထက်၊ ကိုယ့်မြန်မာကျပ်ငွေကိုက တန်ဖိုးကျသွားတော့ ထိုင်းဘက်က ကုန်ပစ္စည်းတွေက မြန်မာကျပ်ငွေနဲ့တွက်ရင် အလိုလိုနေရင်းနဲ့ကို ဈေးကတက်သွားတာ။ မနှစ်က မြန်မာငွေ (၁) သိန်းကျပ်နဲ့ဝယ်ရတဲ့ပစ္စည်းက အခု (၂) သိန်းကျပ် ဖြစ်သွားပြီး။ ဘယ်လိုမှလည်း လုပ်မရဘူး။ အဲ့ဒီအပြင်ကို ကုန်စည်ပို့ဆောင်ဖို့အတွက်ကလည်း လမ်းကြောင်းမှာက လမ်းတွေကပျက်၊ ဂိတ်ကြေးတွေက မတရားတက်နဲ့ ဘယ်လိုမှကို အဆင်ပြေမနေဘူး” ဟု ပြောသည်။
ယမန်နှစ် ဇူလိုင်လအတွင်းက မြန်မာကျပ်ငွေ (၁၀၀၀၀၀) ကျပ်လျှင် ထိုင်းဘတ်ငွေ (၁၀၀၀) ဘတ် နှုန်းဖြစ်ခဲ့သော်လည်း ယခုနှစ် ဇူလိုင်လအတွင်း မြန်မာကျပ်ငွေ (၁၀၀၀၀၀) ကျပ်လျှင် ထိုင်းဘတ်ငွေ (၇၅၀) ဘတ်သာ ပေါက်ဈေးရှိနေကြောင်းလည်း ငွေကြေးလှဲလှယ်ရေးလုပ်ငန်းလုပ်ကိုင်သူများက ထံမှ သိရသည်။
အလားတူ ယခင်နှစ်က ထိုင်းဘတ်ငွေ (၅၀၀၀၀) တန် Without Car တစ်စီးလျှင် မြန်မာကျပ်ငွေ သိန်း (၃၀) ကျပ်သာပေးရသော်လည်း လက်ရှိတွင် မြန်မာကျပ်ငွေ (၆၅) သိန်းနှုန်းဖြင့် ပေးချေနေရကြောင်းလည်း ကားဝယ်ရောင်းလုပ်ဆောင်နေသူများက ဆိုကြသည်။
ထိုင်း -မြန်မာနယ်စပ် ကုန်သွယ်ရေးမြို့ဖြစ်သည့် မြဝတီမြို့အပြင် မြန်မာနိုင်ငံနှင့် နယ်စပ်ခြင်းထိစပ်စပ်နေသော နေရာတိုင်း၌ မြန်မာကျပ်ငွေအပြင် ထိုင်းဘတ်ငွေများ အသုံးပြုနေကြသော်လည်း ထိုင်းနိုင်ငံထုတ် ကုန်ပစ္စည်းများ ဝယ်ယူရာတွင် ထိုင်းဘတ်ငွေဖြင့် သာဝယ်ယူနေကြကြောင်း ကုန်သည်များက ဆိုကြသည်။
ထိုင်းနိုင်ငံထုတ် ကုန်ပစ္စည်းများအား ထိုင်းဘတ်ငွေဖြင့် ဝယ်ယူပါက ဈေးနှုန်းအပြောင်းအလဲ မရှိသော်လည်း မြန်မာဘက်ခြမ်းမှ ကုန်သည်များအနေဖြင့် မြန်မာကျပ်ငွေကို ထိုင်းဘတ်ငွေဖြင့်လဲလှယ်ပြီးမှ ကုန်ပစ္စည်းများဝယ်ယူနေကြရသည့်အတွက်ကြောင့် ငွေကြေးကုန်ကျမှုပိုမိုများပြားကြောင်း ကုန်သည်တစ်ဦးက ပြောကြားသည်။
ထိုင်းနိုင်ငံထုတ်ကုန်ပစ္စည်းများကို နယ်စပ်လမ်းကြောင်းများမှတဆင့် ပြည်တွင်းသို့ ပို့ဆောင်လျှက်ရှိကြောင်း စားသုံးဆီမျိုးမျိုး၊ စားသောက်ကုန်များနှင့် အချိုရည် အမျိုးမျိုး၊ ဘိလပ်မြေ နှင့် ဆောက်လုပ်ရေးပစ္စည်းအမျိုးမျိုး၊ လူသုံးကုန်ပစ္စည်းအမျိုးမျိုး တင်သွင်းလျှက်ရှိသည်။
၂၀၂၄ ခုနှစ် ဇန်နဝါရီလမှ မေလအထိ ထိုင်းနှင့်မြန်မာအကြား ကုန်သွယ်မှုတန်ဖိုးသည် ဒေါ်လာ ၃ ဘီလျံရှိခဲ့ပြီး ထိုပမာဏသည် ပြီးခဲ့သည့်နှစ်ကထက် ၁၀ ဒသမ ၄၆ ရာခိုင်နှုန်းကျဆင်းသွားခဲ့ကြောင်း Prachachat သတင်းဝက်ဘ်ဆိုက်က ဖော်ပြခဲ့သည်။