ဇူလိုင် (၁၉) ရက်နေ့က ကျိုက်မရောမြို့နယ် ချောင်းနှစ်ခွရွာအနီး ငပုအင်းရွာနှင့် လွှစင်ကုန်းလမ်းဆုံ၌ မြန်မာစစ်တပ်က တိုက်လေယာဉ် ၂ စီးဖြင့် ဗုံး ၄ လုံးကြဲချရာတွင် လူပေါင်း ၂၄ ဦးထက်မနည်း သေဆုံးသွားပြီး ၁၀ ဦးထက်မနည်း ထိခိုက်ဒဏ်ရာရရှိခဲ့သည်ဟု ဒေသခံတို့က ပြောဆိုသည်။
အဆိုပါ ငပုအင်းရွာ ဘုန်းကြီးကျောင်းပေါ်တွင် KNLA တာဝန်ရှိသူများ၊ PDF ဂဠုန်စစ်ကြောင်း၊ ကျားဖြူစစ်ကြောင်းနှင့် ပြည်သူ့ကာကွယ်ရေးတပ်ဖွဲ့တို့က ဇူလိုင် ၁၉ ရက် နံနက် ၁၀ နာရီအချိန် အစည်းအဝေးလုပ်မည့်သတင်း ရရှိသည့်အတွက် လေယာဉ်ဖြင့် ဗုံးကြဲချခဲ့ကြောင်း စစ်ကောင်စီတယ်လီဂရမ်များက ရေးသားသည်။
ဗုံးတိုက်ရိုက်ထိမှန်မှုကြောင့် လူသေအလောင်းများမှာ အသားစကြေမွပျက်စီးကုန်ပြီး မည်သူမည်ဝါမှန်း ခွဲခြား၍မရနိုင်သော အရပ်သား ၁၆ ဦးအပါအဝင် PDF တပ်ဖွဲ့ဝင် ၉ ဦးထက်မနည်း သေဆုံးကြောင်း၊ ပျောက်ဆုံးနေသူများကိုလည်း သက်ဆိုင်ရာမိသားစုဝင်တို့က လိုက်လံရှာဖွေနေကြဆဲဖြစ်ကြောင်း သတင်းရရှိသည်။
လူသေအလောင်းများအနက် အသက် ၁၄ နှစ်အောက် ကလေးငယ် ၅ ဦး၊ ကိုယ်ဝန်သည် ၁ ဦး၊ အမျိုးသမီး ၂ ဦး တို့ကို ခွဲခြားသိရှိခဲ့ရသည်ဟု ရွာခံအချို့က ပြောသည်။
သေဆုံးသူအရပ်သားများသည် နောက်တစ်နေ့တွင် ကျရောက်မည့် ဝါဆိုလပြည်နေ့အတွက် ငပုအင်းဘုန်းတော်ကြီးကျောင်း ဝေယျာဝစ္စ ကုသိုလ်အမှု ပြုလုပ်ဆောင်ရွက်နေကြသည့် ဒေသခံ မွန်၊ ကရင်နှင့် မြန်မာတိုင်းရင်းသားများ ဖြစ်ကြောင်း သိရသည်။