💪မွန်ပြည်သစ်ပါတီ စတင်တည်ထောင်ခြင်း

မွန်ပြည်သူ့တပ်ဦးအနေဖြင့် ပြောင်းလဲဖြစ်ပေါ်လာသော နိုင်ငံရေးအနေအထားအရ ပါလီမန် ဒီမိုကရေစီလမ်းကြောင်းပေါ်သို့ လျှောက်လှမ်းသွားနိုင်ရန် နည်းဗျူဟာ ပြောင်းလဲ၍ ၁၉၅၈ ခုနှစ် ဇူလိုင်လ (၁၉) ရက်နေ့တွင် လက်နက်ချလိုက်ကြသည်။

မွန်ပြည်သူ့တပ်ဦး အလင်းဝင်သည်ကို အချိန်မှီ တားဆီးနိုင်ရန် ပဲခူးရိုးမရှိ ကွန်မျူနစ်ပါတီဗဟိုဌာနချုပ်မှ မွန်ဒေသသို့ ပြန်လာခဲ့သော နိုင်ရွှေကျင်သည် မိမိမျှော်မှန်းထားသလို ဖြစ်မလာခဲ့ပေ။ ရက်ပိုင်းလေးမျှသာ အရောက်နောက်ကျ ခဲ့လေသည်။

၁၉၅၈ ခုနှစ် ဇူလိုင်လအတွင်းမှာပင် နိုင်ရွှေကျင် တစ်ဦးတည်း ပေါင်မြို့သို့ တိတ်တဆိတ် ရောက်လာသည်။ မွန်ပြည်သူ့တပ်ဦးမှ လုပ်ဘော်ကိုင်ဘက်အားလုံး လက်နက်ချအလင်းဝင်သွားကြသဖြင့် တိုင်ပင်ဆွေးနွေးစရာဆို၍ မည်သူမျှမရှိတော့ပါ။ ဇာတိမြေမှ အပေါင်းအသင်းဟောင်း နိုင်ငံရေးသမားများနှင့် လယ်တောထဲတွင် တိတ်တဆိတ် လှို့ဝှက်၍ တွေ့ဆုံ ဆွေးနွေး တိုင်ပင် ကြသည်။

နိုင်ရွှေကျင်က “အရင်းရှင် ပါလီမန် ဒီမိုကရေစီစံနစ်မှာ ကောက်ကျစ် စဉ်းလဲမှုတွေ သိပ်များတယ်။ ကလိမ်ဥာဏ်တွေ အလွန့်အလွန် များတယ်။ အရင်းရှင် ပါလီမန်အပေါ် လုံးဝဥဿုံ ယုံကြည် စိတ်ချလို့ မဖြစ်ပါဘူး။ တပ်ဦးလက်နက်ချလိုက်တဲ့အတွက် မွန်အမျိုးသား ကိုယ်စားပြုတဲ့ လက်နက်ကိုင် တော်လှန်ရေး ပါတီတရပ် ဆက်လက်ရှိသွားဘို့ သိပ်ကို လိုအပ်နေသေးတယ်လို့ ကျွန်တော်မြင်တယ်” ဟု ဆိုသည်။

ရွေးကောက်ပွဲတွင် မဲအလိမ်ခံခဲ့ရဖူးသော နိုင်ရွှေကျင်သည် မြန်မာ့နိုင်ငံရေးလောက၏ ပါလီမန် ဒီမိုကရေစီစနစ်အပေါ် လုံးဝအယုံအကြည်ရှိသူ မဟုတ်ပေ။ မွန်ပြည်သူ့တပ်ဦး လက်နက်ချ အလင်းဝင်သော်လည်း ဝန်ကြီးချုပ် ဦးနုက မွန်ပြည်နယ်ကို အလွယ်တကူ ပေးလိမ့်မည်မဟုတ်ဟု နိုင်ရွှေကျင်၏ ဖြတ်သန်းလာခဲ့ရသော နိုင်ငံရေး အတွေ့အကြုံများအရ နားလည်ထားသည်။

မြန်မာ့လွတ်လပ်ရေးမရခင်ကတည်းက မွန်အမျိုးသားတို့၏ တောင်းဆိုချက် (၇) ချက်ကို ရန်ကုန်မြို့ရှိ ဝန်ကြီးချုပ်ရုံးခန်းသို့ နိုင်ရွှေကျင် ကိုယ်တိုင် သွားရောက်တောင်းဆို ဆွေးနွေးပြောဆိုခဲ့စဥ်က မွန်မျိုးနွယ်ဝင်တစ်ဦးကဲ့သို့ ခံယူထားသော ဝန်ကြီးချုပ် ဦးနုနှင့် ဖဆပလတို့၏ သဘောထားကို ကောင်းကောင်းကြီး နားလည် သဘောပေါက်ထားသူ ဖြစ်သည်။ မဟာဗမာအမျိုးသားရေးဝါဒီ ဖဆပလအစိုးရ အနေဖြင့် မွန်ပြည်နယ်ပေးမည့် မူဝါဒမရှိခဲ့သည်ကိုလည်း သဘောပေါက်ထားသူဖြစ်သည်။

“မွန်ပြည်သူ့တပ်ဦးပါတီဟာ လက်နက်နဲ့ ဒီမိုကရေစီလဲလှယ်ရေးဆိုတဲ့ ဦးနုအစိုးရရဲ့ လိမ်မာပါးနပ်တဲ့ နိုင်ငံရေး လှည့်ကွက်ကို ယုံကြည်ပြီး အလင်းဝင် သွားကြတယ်။ မျှော်လင့်ထားသလို မွန်ပြည်နယ်ဟာ လွယ်လွယ်ကူကူနဲ့ ပေါ်ပေါက်လာမှာ မဟုတ်ပါဘူး။ မွန်ပြည်နယ်ရဘို့ ဆိုတာလဲ မလွယ်ပါဘူး။ ဖဆပလ အစိုးရဟာ အပြောနဲ့ လက်တွေ့ ကိုက်ညီမှ ကိုက်ညီမှာ” ဟု နိုင်ရွှေကျင်က ကြိုတင်နိမိတ်ဖတ်ခဲ့သည်။

မွန်ပြည်သူ့တပ်ဦး လက်နက်ချအလင်းဝင်လိုက်သည့်အတွက် မွန်အမျိုးသားတို့၏ လက်နက်ကိုင်တော်လှန်ရေး လှုပ်ရှားမှုမှာ အဆက်ပြတ် သွားနိုင်သည်။ ထို့ကြောင့် မွန်အမျိုးသားလွတ်မြောက်ရေး၊ မွန်တော်လှန်ရေးကို ဆက်လက်တာဝန်ယူ ဆောင်ရွက်သွားမည့် မွန်အမျိုးသားကိုယ်စားပြု ပါတီတရပ် ဆက်လက် ရှိနေသင့်သည်ဟု ရှုမြင်ကြပြီး မွန်ပြည်သစ်ပါတီကို ဖွဲ့စည်းကြသည်။

ပေါင်မြို့ နိုင်ပဲ (နိုင်ၜဲ) ၏ လယ်တဲ၌ နိုင်ရွှေကျင်၊ နိုင်သက်ထွန်း (နိုင်ဝယ်)၊ နိုင်မောင်ညို နှင့် အပေါင်း အသင်းဟောင်း နိုင်ငံရေးသမားများက ပါဝင်တက်‌ရောက်ကြသည်။ မွန်ပြည်သူ့တပ်ဦး အလင်းဝင်ပြီး နောက်တစ်ရက် ဇူလိုင် (၂၀) ရက်ကို မွန်ပြည်သစ်ပါတီ ဖွဲ့စည်းတည်ထောင်သောနေ့အဖြစ် အတည်ပြုသတ်မှတ်ကြလေသည်။

ထိုအချိန်မှစ၍ မွန်ပြည်သစ်ပါတီသည် မွန်ပြည်သူ့တပ်ဦး နေရာဟောင်းတွင် ပုခုံးပြောင်း၍ အစားထိုး ဝင်ရောက် နေရာယူလိုက်သည်။ မွန်လူမျိုးတို့၏ လွတ်မြောက်ရေး တော်လှန်ရေးသည်လည်း ခေတ်သစ် တခေတ်ကို ပြန်လည် ဆန်းသစ်ခဲ့ပြန်သည်။

နိုင်မောင်ညိုသည် သထုံခရိုင်တခွင်တွင် လှို့ဝှက်စွာလှုပ်ရှား၍ အင်အားစုဆောင်းလာခဲ့သည်။ ထို့အတူ နိုင်သက်ထွန်းသည်လည်း မော်လမြိုင်ခရိုင် တောင်ပေါက်ဒေသသို့ သွားရောက်၍ ထိုးဖောက်စည်းရုံးရေး လုပ်ဆောင်ခဲ့သည်။

မွန်ပြည်သူ့တပ်ဦးလက်နက်ချအလင်းဝင် သွားခဲ့သော်လည်း မော်လမြိုင်ခရိုင်ဘက်တွင် လက်နက်မချဘဲ လှို့ဝှက်စွာ ကျန်ရှိနေသူတချို့နှင့် နိုင်ရွှေကျင် အဆက်အသွယ် ရလာခဲ့သည်။

ကရုပ္ပိရွာသား နိုင်ဓမ္မနေသည် မွန်ပြည်သူ့တပ်ဦး အလင်းဝင်ခဲ့စဥ်က ပါဝင်ခဲ့ခြင်းမပြုဘဲ ဝှက်ထားသော လက်နက်အချို့ကို ယူဆောင်၍ တောင်ပေါက်နယ်တွင် လှုပ်ရှားနေခဲ့သည်။ နိုင်ရွှေကျင်နှင့် အဆက်သွယ်ရလာပြီး မွန်ပြည်သစ်ပါတီအဖွဲ့ဝင် ဖြစ်လာသည်။

နောက်ပိုင်းတွင် ဥက္ကဌ နိုင်ရွှေကျင် လာရောက်တွေ့ဆုံပြီး နိုင်ဓမ္မနေကို မွန်ပြည်သစ်ပါတီ အတွင်းရေးမှူးအဖြစ် ခန့်အပ်တာဝန်ပေးခဲ့သည်။

မွန်ပြည်သူ့တပ်ဦး လက်နက်မချမီ တစ်လအလိုဖြစ်သော ဇွန်လအတွင်းမှာပင် တည်မြဲဖဆပလက ဦးနု၏ အစိုးရအပေါ် အယုံအကြည်မရှိ အဆိုကို လွှတ်တော်၌ တင်သွင်းခဲ့ပြီး မဲခွဲဆုံးဖြတ်မှုတွင် ၁၂၇ မဲ၊ ၁၁၅ မဲဖြင့် အစိုးရက အနိုင်ရခဲ့သည်။ ပမညတ (ပြည်ထောင်စုမြန်မာနိုင်ငံ အမျိုးသားညီညွတ်ရေးတပ်ပေါင်းစု) ၏ ထောက်ခံမှု ဦးနုအစိုးရ ၁၂ မဲအသာဖြင့် အနိုင်ရရှိခဲ့ခြင်း ဖြစ်သည်။

ထိုနောက် ဝန်ကြီးချုပ်ဦးနု၏ လက်နက်နှင့်ငြိမ်းချမ်းရေး လဲလှယ်ရေးဟူသည့် ခေါင်းစဉ်အောက်တွင် မွန်ပြည်သူ့တပ်ဦး၊ ပအိုဝ်းအမျိုးသားအဖွဲ့ချုပ်၊ ရခိုင်ပြည်နယ် လွတ် မြောက်ရေးအဖွဲ့၊ ရခိုင်ဒေသမှ ဗမာပြည် ကွန်မြူနစ်ပါတီ၊ ဗကပ အောက်မြန်မာပြည်တိုင်း၊ ကရင် အမျိုးသားညီညွတ်ရေးပါတီ (KNUP) ပဲခူးရိုးမတိုင်းနှင့် တောခိုရဲဘော်ဖြူအဖွဲ့ စုစုပေါင်း တောတွင်းလက်နက်ကိုင် ၅၅၀၀ ဦးခန့် လက်နက်စွန့်၍ အလင်းဝင်ခဲ့သည်ဟု အစိုးရက သတင်းထုတ်ပြန်ခဲ့သည်။

ယင်းသို့ ပါလီမန်ဒီမိုကရေစီသို့ ကူးပြောင်းလာရန် တောတွင်လက်နက်ကိုင်အဖွဲ့အစည်းများက အစုလိုက်အပြုံလိုက် လက်နက်ချအလင်းဝင်လာကြပြီးနောက် စစ်တပ်မှ အာဏာသိမ်းမည့် အသံများ ပေါ်ထွက်လာသည်။ စက်တင်ဘာလ ၂၆ ရက်တွင် ဦးနုက တိုင်းပြည်သို့ ရေဒီယိုမှတဆင့် မိန့်ခွန်းပြောကြားခဲ့ရာတွင် တပ်မတော်ကို အစိုးရအာဏာလွှဲပြောင်းယူရန် ဖိတ်ခေါ်ခဲ့သည်။

ထိုနောက် နောက် အောက်တိုဘာလ ၂၈ ရက်တွင် ပြည်သူ့လွှတ်တော်အစည်းအဝေးကျင်းပ၍ ဝန်ကြီးချုပ်ဦးနု အပါအဝင် အစိုးရအဖွဲ့တစ်ခုလုံး ရာထူးမှ နှုတ်ထွက်ခဲ့ပြီး ဗိုလ်ချုပ်နေဝင်းကို ဝန်ကြီးချုပ်သစ်အဖြစ် အဆိုပြု တင်မြှောက်ခဲ့သည်။ ဗိုလ်ချုပ်နေဝင်း ဦးဆောင်၍ အိမ်စောင့်အစိုးရကို ဖွဲ့စည်းခဲ့ပြီး အာဏာ လွှဲပြောင်းရ ယူခဲ့သည်။

အာဏာလွဲအပ်ပေးသည့်နေ့က ဝန်ကြီးချုပ်သစ် ဗိုလ်ချုပ်ကြီးနေဝင်း ပါလီမန်အတွင်း မိန့်ခွန်း ပြောကြားရာတွင် သန့်ရှင်းဖဆပလအစိုးရမှ ထုတ်ပြန်ထားသော သင်ပုန်းခြေလွတ်ငြိမ်းချမ်းသာခွင့် ဥပဒေကိုလည်း ရုတ်သိမ်းလိုက်ပြီဟု ဆိုသည်။

မွန်ပြည်သစ်ပါတီ ဥက္ကဌ နိုင်ရွှေကျင် ကြိုတင် နိမိတ်ဖတ်ခဲ့သလိုပင် မွန်၊ ရခိုင်တို့အား ပြည်နယ်သစ်များ သတ်မှတ် ပေးရမည့်အရေးမှ ဗိုလ်ချုပ်နေဝင်းအား အိမ်စောင့်အစိုးရအနေဖြင့် အာဏာလွှဲအပ်ကာ ဦးနုက လိမ္မာပါးနပ်စွာ ရှောင်တိမ်းထွက်သွားခဲ့လေတော့သည်။

ဗိုလ်ချုပ်နေဝင်း အိမ်စောင့်အစိုးရလက်ထက်တွင် လက်နက်ချ မွန်ပြည်သူ့တပ်ဦး ဗဟိုကော်မတီဝင်များကို မျက်စိအောက်မှ အလွတ်မခံတော့ပေ။ တည်မြဲဖဆပလသြဇာခံများ ဖြစ်ကြသော စစ်တပ်၊ ရဲနှင့် အစိုးရ လက်ပါးစေ ဝန်ထမ်းအချို့၏ အကွက်ဆင် ဖန်တီးမှုကြောင့် မွန်ပြည်သူ့တပ်ဦး အဖွဲ့ဝင်များသာမက ထောက်ခံသူ ပြည်သူလူထုများသည်လည်း ဖမ်းဆီးထောင်ချခံရ၏။ အထူးသဖြင့် ရေးမြို့နယ်တွင် ဖမ်းဆီးခံရသူ များကို ပုဒ်မတပ်စရာမရှိ၍ ၁၁၉ ၊ ၁၁၀ တပ်ကာ ထောင်ချခဲ့သည့် ဖြစ်ရပ်များစွာ ရှိခဲ့ဖူးသည်။

ထိုကြောင့် မွန်ပြည်သူ့တပ်ဦးလက်နက်ချခဲ့သည်ကို မွန်ပြည်သူလူထုက ပို၍ မကျေမနပ်ဖြစ်လာတော့သည်။ လက်နက်ချပွဲကို ဦးဆောင်ခဲ့သည့် မွန်ပြည်သူ့တပ်ဦးခေါင်းဆောင်များကိုလည်း မွန်လူထုများက ပြစ်တင်ပြောဆို ရှုံ့ချမှုများ ပြုလုပ်လာကြသည်။

မွန်ပြည်သူ့တပ်ဦး လက်နက် စွန့်ပြီး (၃) လကျော်ခန့်အကြာတွင် အိမ်စောင့်အစိုးရသစ် တက်လာသည်၊ လက်နက်ချလျင် မွန်ပြည်နယ်ပေးမည်ဆိုသော ဦးနု ကတိပျက်ခဲ့သည်၊ ထို့ကြောင့် ဝန်ကြီးချုပ်ဟောင်း ဦးနုကိုလည်း ဗီလိန်တစ်ဦးအဖြစ် မွန်အမျိုးသားသမိုင်းတွင် ကျန်ရစ်နေခဲ့သလို “ဗမာတွေပေးတဲ့ကတိ ဘယ်တော့မှမယုံမိနဲ့” ဆိုသည့်စကားမှာ လူအပြောများခဲ့သည်။

နောက်ဆုံး ဒီမိုကရေစီရမည်ဆိုသဖြင့် လက်နက်စွန့်၊ လက်နက်ချခဲ့ကြသည့် မွန်ပြည်သူ့တပ်ဦး အဖွဲ့ဝင် မျိုးချစ် အများအပြား ဖမ်းဆီးထောင်ချ ခံရခြင်းဖြင့် ဘဝများ နိဂုံးအဆုံးသတ် ခဲ့ရသည်။ တချို့မှာ ရပ်ရွာကိုစွန့်ခွာ၍ ရပ်ဝေးသို့ ပြောင်းရွှေ့ထွက်ခွာ သွားကြသည်။ တချို့မှာ မွန်ပြည်သစ်ပါတီသို့ ဝင် ရောက်သွားကြသည်။

ထိုအချိန်မှစ၍ တက္ကသိုလ်ကျောင်းသား ပညာတတ်လူငယ်များ၊ မွန်ပြည်သူ့တပ်ဦးအဖွဲ့ဝင်ဟောင်းများနှင့် မွန်လူငယ်အများအပြားတို့သည် ဥက္ကဌကြီး နိုင်ရွှေကျင် ဦးဆောင်သော မွန်ပြည်သစ်ပါတီသို့ မျိုးချစ်စိတ်အရင်းခံဖြင့် အစုလိုက်အပြုံလိုက် ဝင်ရောက်ကြလေသတည်း။
(ပြီး)

ကိုးကား
-အတိတ်၏ အရိပ် (နိုင်ရွှေကျင်)
-ဥက္ကဌကြီး နိုင်ရွှေကျင်နှင့် တော်လှန်ရေးသမား၊ ဒို့မွန်ကျောင်းသား (နိုင်ဖေသိန်းဇြာ)