ကျိုက်မရောမြို့နယ် ချောင်းနှစ်ခွကျေးရွာအုပ်စု သံပုရာရွာသစ် (နဘူးအင်း) နှင့် လွှစင်ကုန်းရွာတို့တွင် ယမန်နေ့ ဇူလိုင်လ (၁၉) ရက်နေ့ နံနက်ပိုင်းက စစ်ကောင်စီ လေယာဉ်ဗုံးကြဲတိုက်ခိုက်မှုကြောင့် လူ (၂၀) ဦးထက်နည်း ထိခိုက်ဒဏ်ရာ သေဆုံးခဲ့ကြောင်း ဒေသခံများထံမှ သိရသည်။
ငပုအင်းရွာသစ် ဘုန်းကြီးကျောင်းနှင့် လွှစင်ကုန်းကျေးရွာလမ်းဆုံ၌ ယမန်နေ့နံနက် ၁၀ နာရီဝန်းကျင်တွင် စစ်ကောင်စီတိုက်လေယာဉ်ဖြင့် ဗုံး (၄) လုံး ကြဲချတိုက်ခိုက်သွားခြင်းဖြစ်ကြောင်း ဒေသခံတစ်ဦးက ပြောသည်။
” ဗုံးက ထမင်းချက်နေတဲ့ စားဖိုဆောင်ကို တည့်တည့်ကျတာ၊ အယောက် ၂၀ ကျော် ထိခိုက်သေဆုံးခဲ့တယ်၊ အဲဒီအထဲမှာ ကျားဖြူစစ်ကြောင်းက သုံးယောက် ထိတယ်၊ ရွာသားတွေ အထိများတယ်၊ သေတာတွေလည်းရှိတယ်၊ လူငယ် ငါးယောက်ပါတယ်၊ ကိုယ်ဝန်ဆောင် တယောက်လည်းပါတယ်၊ ဘယ်သူဘယ်ဝါမှန်းသိတာက ၁၃ လောင်း၊ ကျန်တာ ဘယ်သူဘယ်ဝါ ခွဲလို့မရဘူး” ဟု ပြောသည်။
ငပုအင်းရွာသစ်တွင် KNLA အဖွဲ့၊ Lion Battalion စစ်ကြောင်း၊ ကျားဖြူစစ်ကြောင်း၊ ဂဠုန်စစ်ကြောင်းမှ ခေါင်းဆောင်များ အစည်းအဝေးလုပ်မည့်သတင်းပေးချက်အရ လေကြောင်းဖြင့် ဗုံးကြဲတိုက်ခိုက်ခြင်း ဖြစ်ကြောင်း စစ်ကောင်စီတယ်လီဂရမ်များက အတည်ပြုရေးသားကြသည်။
ထိုအခြေအနေများကြောင့် ကျိုက်မရော (စံပယ်ဂူ) တံတားမှ ဖာသိမ် – လွှစင်ကုန်း လမ်းပိုင်းအား ပိတ်ထားကြောင်း ခရီးသွားပြည်သူများ၏ ပြောကြားချက်များအရ သိရသည်။
ပြီးခဲ့သည့် နိုဝင်ဘာလအတွင်းက အဆိုပါ ချောင်းနှစ်ခွကျေးရွာရှိ ရဲစခန်းတိုက်ခိုက်၍ အတ္ထရံတံတား (ချောင်းနှစ်ခွ) ကို တော်လှန်ရေးပူးပေါင်းအဖွဲ့များမှ မိုင်းခွဲဖျက်ဆီးပြီး တိုက်ခိုက်ခဲ့ရာမှ ချောင်းနှစ်ခွဒေသအတွင်း တိုက်ပွဲများပြင်းထန်စွာ ဖြစ်ပွားလာခဲ့သည်။
လက်ရှိတွင်လည်း ချောင်းနှစ်ခွကျေးရွာအရှေ့ဘက်ခြမ်းအား တော်လှန်ရေးပူးပေါင်းတပ်ဖွဲ့များက တစ်ဖက်၊ ချောင်းနှစ်ခွကျေးရွာ နှင့် အတ္ထရံမြစ်အနောက်ခြမ်းအား စစ်ကောင်စီတို့က တစ်ဖက် အသီးသီး ထိန်းချုပ်ထားဆဲ ဖြစ်သည်။