🌠 🎀 မွန်ခမာနိုင်ငံတော် အိပ်မက် 🎀 🌠

နိုင်တလမွန်နှင့် နိုင်လယိထောတို့မှာ အောင်မြေစခန်းစစ်သင်တန်းသို့ မတက်ရောက်နိုင်ဘဲ မွန်ပြည်သစ် ပါတီ၏တာဝန်ပေးချက်အရ ကမ္ဘောဒီယားသို့ ၁၉၇၁ ခုနှစ် ဂျူလိုင်လတွင် ခရီးထွက်ရသည်။

ဖြစ်စဉ်မှာ ကမ္ဘောဒီးယားနိုင်ငံသမ္မတ လုံနိုး Marshal Lon Nol က မွန်ခမာမျိုးနွယ်ချင်းချစ်ကြည်ရင်းနှီးရန် သံတမန်တစ်ဦးစေလွှတ်ပြီး ဟံသာဝတီမွန် (မြန်မာနိုင်ငံမွန်)တို့နှင့် ဆက်သွယ်ရန် ချိတ်ဆက်သည်။ ထိုမွန်ခမာချစ်ကြည်ရေး တနည်းအားဖြင့် ကမ္ဘောဒီးယား အစိုးရနှင့် မွန်ပြည်သစ်ပါတီတို့၏ တွေ့ဆုံမှုတွင် အရေးကြီးသည်ပုဂ္ဂိုလ်မှာ အလယ်လူ ထိုင်းမွန်အမျိုးသားတစ်ဦး နိုင်မင်းဖြစ်သည်။ လော့ဗူရီ ထိုင်း မွန်အခေါ် ဝေါမြို့သား နိုင်မင်းသည် မွန်ခမာနှစ်နိုင်ငံ ချစ်ကြည်ရေးတွင် သမိုင်း တင်ရမည် အကျိုးဆောင်မျိုးချစ် ဖြစ်သည်။

ကမ္ဘောဒီးယားသမ္မတ လုံနိုးက မွန်ခမာမျိုးနွယ်စုဝင် ဟံသာဝတီမွန်တို့နှင့် တွေ့ဆုံ မိတ်ဆက်ရန် အဆင့်မြင့် သံတမန်အရာရှိတစ်ဦးကို စေလွှတ်ပြီး ဘန်ကောက်မြို့ အနုစာဝရီကျောက်တိုင်အနီးရှိ ဝတ်တရီ ထိုင်းမွန် ဘုန်းကြီးကျောင်းသို့ ဦးစွာ လာဆက်သွယ်သည်။ ထိုကျောင်းမှတဆင့် ထိုင်းမွန်အမျိုးသား နိုင်မင်းနှင့် ပထမတွေ့ ဆုံပြီး နိုင်မင်းက ဘန်ကောက်မြို့တွင် တညလရုံးထိုင်နေသည် မွန်ပြည်သစ်ပါတီ ဥက္ကဌကြီးနိုင်ရွှေကျင်နှင့် မိတ်ဆက်ပေးသည်။

ထိုတွေ့ဆုံမှုသည် ကမ္ဘောဒီးယားအစိုးရနှင့် မွန်ပြည်သစ်ပါတီ (သို့မဟုတ်) မွန်ခမာမျိုးနွယ်စုအတွက် နှစ်ပေါင်းများစွာ ဝေးကွာခဲ့ကြသည် မိသားစုနှင့် ပြန်တွေ့ရသလို ဝမ်းသာကြည်နူးဖွယ်ရာပင်။

ကမ္ဘောဒီးယားသမ္မတ လုံနိုး၏ အနာဂတ်အိပ်မက်လည်း ကြီးမားသည်။ မွန်ခမာမျိုးနွယ်စုတို့ကို ဗီယက်နမ်နှင့် ထိုင်းများက စိုးမိုးချယ်လှယ်လျက်ရှိရာ မိမိတို့မွန်ခမာသွေးချင်းများ စုစည်းညီညွတ်ရန်လိုသည်။ ထို စုစည်းညီညွတ်မှုမှတဆင့် မွန်ခမာအာဏာစက်ဖြင့် မွန်ခမာနိုင်ငံ ပြန်လည်ထူထောင်ရန်အထိ ရည်ရွယ်ထား သည်။ သမ္မတလုံနိုး၏ အစီအစဉ်မှာ မွန်ခမာမျိုးနွယ်စုတို့ အချင်းချင်း ခင်မင်ရင်းနှီးလာရာမှ အပြန်အလှန်ကူညီ အားပေးကာ မွန်ခမာအင်အားကြီးထွားရေး ဖြစ်သည်။

၁၉၇၁ ခုနှစ် စက်တင်ဘာလ၊ ၁၆ ရက်တွင် မွန်ပြည်သစ်ပါတီဥက္ကဌနိုင်ရွှေကျင်၊ နိုင်တလမွန်နှင့် နိုင်ရွှေလွင် (နိုင်လယိထော) တို့သည် ထိုင်းနိုင်ငံမှတဆင့် ကမ္ဘောဒီးယားနိုင်ငံသို့ သွားရောက်ပြီး သမ္မတလုံနိုးနှင့် တွေ့ ဆုံခဲ့ကြသည်။ နှစ်ဦးနှစ်ဖက်သဘောတူညီမှအရ နိုင်တလမွန်နှင့် နိုင်လယီထောတို့ကို မွန်သံတမန်အဖြစ် ဖနွံပင် မြို့တော်တွင် လက်ခံထားရှိခဲ့သည်။

သူတို့နှစ်ဦးကို အထူးဧည်သည်အဖြစ်အလေးပေးပြီး မွန်ခမာအင်စတီကျူ့ ခေါ် ခမာမွန်လေ့လာရေး သိပ္ပံ (Khmer-Mon Institute)တွင် မွန်ခမာစာပေယဉ်ကျေးမှုရေးရာများကို အပြန်အလှန် သင်ကြားလေ့လာရင်း နေထိုင်စေသည်။ ခမာမွန်အင်စတီကျူ့က ပညာရေးဝန်ကြီးထိုက်ဂျာနှင့် တွေ့ဆုံစေခဲ့ရာ ဝန်ကြီးက ကမ္ဘောဒီးယား ၅ ခရိုင်သို့ လေ့လာလည်ပတ်ရန် ၅ ရက်တာ (၁၄-၇-၇၂ မှ ၁၉-၇-၇၂) စစ်လေယာဉ် တစ်စင်းကို သုံးစွဲခွင့်ပေးပြီး လိုက်ပို့ပေးသည်။ သူတို့နှစ်ဦးသည် ၁၉၇၂ ခုနှစ် အောက်တိုဘာလ ၁၉ ရက်မှ နိုဝင်ဘာ ၁၈ ရက်အထိ တစ်လ ခွင့်ယူပြီး မွန်ပြည်သစ်ပါတီဗဟိုသို့ ဖနွမ်ပင်-ဘန်ကောက်လေယာဉ်စီးကာ အလည်ပြန်လာကြသည်။ မွန်ပြည်သစ်တီ၏ ရွှေလက်တွဲခဲ့သည် နိုင်ငံခြားဆက်ဆံရေးသည် တော်လှန်ရေး အတိတ်တွင် ရှိခဲ့သည်။

😺ൠ ခြင်္သေ့လည်ပြန်အလွမ်း ♪👊

၁၉၇၂ ဖေဖေါ်ဝါရီလလယ်တွင် မွန်ပြည်သစ်ပါတီဌာနချုပ်မှ ဥက္ကဌကြီး နိုင်ရွှေကျင်၏ စာတစ်စောင်ကို ပထမဦးဆုံး သူတို့ လက်ခံရရှိသည်။ လျှို့ဝှက်ကြေးနန်းသင်္ကေတနှင့် ရေးထားပြီး ဘန်ကောက်မှတဆင့် နိုင်ရွှေကျင်က ပေးပို့လာခြင်းဖြစ်ပါသည်။

စာထဲတွင် ကိုရွှေလွင်၏ဇနီး မိတင်အေး ၁၉၇၁ ဒီဇင်ဘာနောက်ဆုံးပတ်တွင် သားယောက်ျား မွေးဖွားကြောင်း၊ မိခင်ရော ခလေးပါ ကျန်းမာကြောင်းနှင့် မွန်ပြည်သစ်ပါတီ၏ အခြေအနေတို့ ပါဝင်သည်။ ပါတီဌာနချုပ်ကို သာယာစခန်းမှ ဝါရီရူစခန်းသို့ ပြောင်းရွှေ့ခဲ့ကြောင်း၊ ပြည်တွင်းနှင့် အဆက်အသွယ်ရပြီး မွန်ပြည်သစ်ပါတီသို့ ရဲဘော်သစ်များ၊ ပညာတတ်အမြောက်အများ ဝင်လာကြောင်း ရေးသားထားသည်။

မွန်ပြည်သစ်ပါတီကို တပ်ရင်း (၂) ခုဖြင့် ဖွဲ့စည်းထားရှိကာ အထူးတပ်ရင်း (၁) ခု ပါ ဖွဲ့စည်းထားသည်။ မွန်အမျိုးသားလွတ်မြောက်ရေးတပ်မတော်ကို လက်နက်လုံလောက်စွာ တပ်ဆင်ထားပြီး စစ်ရေးလှုပ်ရှားမှူ များပြား လာသည်။ ထားဝယ်ခရိုင်နှင့် သထုံခရိုင်ကိုလည်း စတင်တိုးချဲ့သည်။ တညလတပ်ပေါင်းစု၏ ပူးတွဲတိုက် ခိုက်ရေးအောင်မြင်နေပြီး မွန်ပြည်သစ်ပါတီတရပ်လုံး၏ အခြေအနေ ကောင်းသည်။ တပ်ပေါင်းစုရေဒီယိုမှ မွန်ဘာ သာဖြင့် အသံလွှင့်နေပြီဟု ရေးသားထားသည်။ ဥက္ကဌကြီးဆီမှ သတင်းစကားက သူတို့အတွက် ကြည်နူး စရာ။

ကမ္ဘောဒီးယားဖနွမ်ပင်တွင် ရောက်ရှိနေသော နိုင်တလမွန် (သာရင်)နှင့် နိုင်လယိထော (ရွှေလွင်) သို့ ဥက္ကဌနိုင်ရွှေကျင်မှပေးပို့သည်စာမှာ ခံစားမှု အဖွဲ့အနွဲ့မပါ။ တော်လှန်ရေးအခြေအနေကိုဖေါ်ပြသည့် ထိုစာကို သူ တို့ အခါခါ ခံစားကြည့်သည်။ သာယာစခန်းသို့ရောက်ပြီး သိပ်မကြာလိုက် သံတမန်တာဝန်ဖြင့် ပြည်ပသို့ ထွက် ခွာလာရသည်။ လယိထောမှာ တော်လှန်ရေးနယ်မြေသို့ အတူလိုက်ပါလာသည် ကြင်စဦးချစ်သူကို ထားရစ်ကာ တစ်ပြည်တစ်ရွာသို့ လာခဲ့ရသည်။ အခုတော့ သူ့ကို စောင်စားမျှော်လင့်နေသည်ချစ်သူတွင် ရင်သွေးငယ်တစ် ယောက်ပင် ရနေပြီ။ လယိထော၏ အတွေးရေအလျင်တွင် လက်နက်ကိုင်ရဲဘော်များအပြင် ချစ်သူနှင့် မွေးစရင် သွေးတို့ ရင်ခုန်စွာ စီးဆင်းနေသည်။

အမျိုးသားရေးတာဝန်ကြောင့်သာ သူတို့ မြတ်နိုးသည် တော်လှန်ရေးဥယျာဉ်ကို ခွဲခွာခဲ့ရသည်။ ယခု တော့ ထိုဥယျာဉ်တွင် ပန်းမျိုးစုံတို့ စုံလင်စွာပွင့်လန်းနေကြပြီ။ အိမ်အပြန်ခရီး အနီးအဝေးကို မသိသည်တိုင် ဥက္ကဌ ကြီးဆီမှ တော်လှန်သောသတင်းစကားကြောင့် သူတို့တွင် အားမာန်များ ပိုရလာသည်။

🌌 🎀 စစ်မီးလျှံကြားက ကမ္ဘောဒီးယား 🎀 🌌

မွန်ပြည်သစ်ပါတီ၏အခြေအနေမှာ သူတို့အတွက် အကောင်းဘက်သို့ ဦးတည်နေသော်လည်း တဖက်တွင် နိုင်တလမွန်တို့၏ သံတမန်ခရီးစဉ်မှာ ကမ္ဘောဒီးယားစစ်မီးလျှံကြောင့် လမ်းစပျောက်သွားသည်။ အလာ ကောင်းသော်လည်း အခါနှောင်းခဲ့သည်။
ခမာတို့၏ သမိုင်းရေစီးကြောင်းသည် ကွေ့ကောက်ကြမ်းတမ်းသောကာလတစ်ခုကို ဖြတ်သန်းနေရသည်။ နိုင်တလမွန်နှင့် နိုင်လယိထောတို့ ဖနွံပင်သို့ရောက်ရှိချိန်တွင် နိုင်ငံတကာအခြေအနေနှင့်အတူ အင်ဒိုချိုင်းနားတွင် စစ်ရေးပြင်းထန်နေသည်။ သူတို့နှစ်ဦးမှာ ကမ္ဘောဒီးယားနိုင်ငံ၏ ပြည်တွင်းစစ်နှင့် တိုးမိသဖြင့် မူလမွန်ခမာအိပ်မက်ကို အကောင်အထည်မဖေါ်နိုင်တော့ပါ။

နိုင်ငံတကာ စစ်အေးတိုက်ပွဲပြင်းထန်ပြီး (လာအို၊ ဗီယက်နမ်၊ ကမ္ဘောဒီးယား) အင်ဒိုချိုင်နားဒေသတွင် ကွန်မြူနစ်သူပုန်နှင့် အရင်းရှင်ကျားကန်သောအစိုးရကြား တိုက်ပွဲပြင်းထန်နေသည်။ ကွန်မြူနစ်မြောက်ဗီယက်နမ်နိုင်ငံက တောင်ဗီယက်နမ်ကို စစ်ဆင်သည်။ ကမ္ဗောဒီးယားအရင်းရှင် အစိုးရသမ္မတလုံနိုးမှာ (ခမာနီ) ကွန်မြူနစ်တပ်တို့၏ တိုက်ခိုက်မှုကို အလူးအလဲ ရင်ဆိုင်နေရသည်။ နိုင်တလမွန်တို့နေထိုင်ရာ ဖနွမ်ပင်မြို့တော်အနီးတွင်ပင် ပစ်ခတ်သံကြားရပြီး စစ်မီးလောင်နေသည်။

☮🍧 နိုင်တလမွန်၏ 🎅♩
နေ့စဉ်မှတ်တမ်းအရ

“ဇန်နဝါရီ ၂၇၊ ၁၉၇၃။ ဗီယက်နမ်စစ် အပစ်အခတ်ရပ်စဲရေးသဘောတူညီချက်ကို လက်မှတ်ထိုးသည်။ စနေနေ့ဖြစ်သည်။ ခမာသမ္မတနိုင်ငံတွင် အခြေအနေထူးခြား၍ လှုပ်လှုပ်ရှားရှား ရှိလှသည်။ နိုင်ငံလုံခြုံရေးအတွက် တိုးချဲ့ကာကွယ်ရေးကို ရေးကြီးသုတ်ပြာ လုပ်နေသည်။ မနက်ဖန် ၂၈.၁.၇၂ တနင်္ဂနွေနေ့ကိုပင် တနေ့လုံး အလုပ်လုပ် (အစိုးရ ဝန်ထမ်း) ကြဖို့ အမိန့်ထုတ်ထားသည်။ ခမာပြည်သား (ဖနွမ်ပင်သား) အားလုံးမှာ စိုးရိမ်တကြီး ရှိနေကြသည်။”

ဇွန်လ ၉၊ ၁၉၇၃။
ခမာနိုင်ငံ စစ်ရေးပြန်လည်လှုပ်ရှားလာပြန်သည်။ ဗုံးကြဲမှုများ ထပ်ရှိလာပြန်သည်။ နံက်စောစော ပိုင်းတွင် ပိုကျင်တောင် လေဆိပ်ကို ၁၂၂ ဒုံးကျည် ၁၂ လုံးခန့် ပစ်သွင်း။ ဗတ်ဒေးဘောင်မြို့၊ ဗတ်ကျန်လေဆိပ်တွင် လည်း ၁၂၂ မမ ဒုံးကျည်နှင့် အလုံး ၅ဝ ခန့်ပစ်သွင်းသည်ဟု ဇွန်လ ၁၁၊ ၁၉၇၃ နေ့ထုတ် “ခမာ့အကျိုး” အစိုးရ သတင်းစာက ဖေါ်ပြခဲ့သည်။

ဇွန်လ ၁ဝ- ၁၅၊ ၁၉၇၃ ထိ စစ်ရေးများ ပြင်းထန်နေသည်။

ဇွန်လ ၁၅၊ ၁၉၇၃ တနေ့လုံး- တညလုံး (၇-၈ ညနေ) လက်နက်ကြီးများ ပစ်ခတ်သံကို နီးနီးကပ်ကပ် ကြားရသည်။

မေလ ၁၅၊ ၁၉၇၃ အင်တမ်း အစိုးရတက်သည်။

ဇူလိုင်လ ၂၂၊ ၁၉၇၃ တွင် ဖနွမ်ပင်မှ ပြန်လာ။” ဟု ရေးသားထားသည်။

နိုင်တလမွန်နှင့် နိုင်လယိထောတို့သည် နောက်ဆုံးတွင် သမ္မတ လုံနိုးကို ခွင့်တောင်းကာ မွန်ပြည်သစ်ပါတီသို့ ပြန်လာရတော့သည်။ ကမ္ဘောဒီးယားမှ ပါလာသည် ငွေကြေးများကို ပါတီသို့ အပ်နှံခဲ့ပြီး သူ့အတွက် နာရီတစ်လုံးနှင့် သစ်သားအောက်ခံ ကိန္နရီကြေးရုပ်တစ်ခုကိုသာ ဝယ်ခဲ့သည်ဟု ဆိုပါသည်။

နောင်တွင် ထိုကိန္နရီ ရုပ်ထုကို မြေအောက်သင်တန်းလာတက်သည် တူတော်မောင် အောင်ဝင်းမြင့် (နိုင်ချမ်းတွဲ့) မှတဆင့် ဘီလူးကျွန်း အိမ်သို့ လက်ဆောင်ပေးခဲ့သည်။

ကမ္ဘောဒီးယားသမ္မတ လုံနိုး၏ ခမာမွန် (မွန်ခမာ) နိုင်ငံတော်တည်ထောင်ရေးအိပ်မက် ပျက်စီးသွားသော်လည်း နိုင်တလမွန်နှင့် နိုင်လယိထောတို့အတွက် အကျိုးအမြတ်တစ်ခု ရရှိသွားကြသည်။ သူတို့နှင့်အတူ မွန်မာစာပေယဉ်ကျေးမှူနှင့်ဘာသာဗေဒ အတွေ့အကြုံ တပွေ့တပိုက်ပါလာကြခြင်းပင်။ နှစ်ဦးစလုံးက ဘာသာစ ကားနှင့် စာပေလေ့လာလိုက်စားသူဖြစ်၍ မူလကကျွမ်းကျင်တတ်မြောက်သော မွန်၊ မြန်မာ၊ အင်္ဂလိက်၊ ထိုင်းဘာ သာအပြင် ခမာ (ကမ္ဘောဒီးယား) ဘာသာစကားကိုပါ အမြတ်ရလိုက်ကြသည်။

သူတို့၏တူညီချက်များမှာ နှစ်ဦးစလုံး ဒဿနိကဗေဒဖြင့် ဘွဲ့ရရှိပြီး ဘာသာစကား၊ ဘာသာဗေဒတို့ကို လေ့လာလိုက်စားသူ ဝါသနာတူသူများ ဖြစ်သည်။ သို့သော် မတူညီသည်အသွင်ပြင်များစွာလည်း ရှိသည်။ နိုင်ရွှေ လွင်က စစ်ရေးတွင် ဦးစားပေးပြီး နိုင်တလမွန်က ဝါဒရေးရာတွင် အလေးထားသည်။ ရွှေလွင်မှာ ကြင်ဖော်ရှိသော်လည်း တလမွန်မှာ တကိုယ်ထဲသမား လူပျိုကြီးဖြစ်သည်။ ကိုရွှေလွင် ကျန်းမာရေးကောင်းသလောက် တလမွန်က ရောဂါစုံ ချူချာသည်။

နိုင်တလမွန်နှင့် နိုင်လယ်ထောတို့သည် ဇူလိုင်လ ၂၂၊ ၁၉၇၃ တွင် ဖနွမ်ပင်မှ ပြန်လာပြီး ဩဂုတ်လ ၁၅ ရက်တွင် မွန်ပြည်သစ်ပါတီ ဗဟိုစခန်းသို့ ပြန်ရောက်ကြသည်။

🎀 (ခရေနီနီတစ်ပွင့်အကြောင်းမှ ကောက်နုတ်ဖော်ပြသည်) 🎀