မော်လမြိုင်မှ ရန်ကုန်ဘက်သို့လာသော မော်တော်ယာဉ်ပေါ်တစ်စီးတွင် လိုက်ပါလာသည့် အသက် (၄၂) နှစ်အရွယ် ခရီးသည် စိုင်းလှ၀င်း (ခ) လှ၀င်း၏ ဆာလာအိတ်အတွင်းမှ စိတ်ကြွရူးသွပ်ဆေးပြား (၁၆၀၀၀၀) ပြားအား ဝေါမြို့၊ ညောင်ခါးရှည်ကျေးရွာအနီး၌ ဖမ်းဆီးရမိခဲ့ကြောင်း မြန်မာနိုင်ငံမူးယစ်ဆေးထိန်းချုပ်ရေးဗဟိုကော်မတီ CCDAC MYANMAR မှ ထုတ်ပြန်ထားသည်။
ပြီးခဲ့သည့် မေလ (၁၃) ရက်နေ့ ၊ ည (၉) နာရီ (၁၅) မိနစ်အချိန်ခန့်က မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့၀င်များပါ၀င်သော ပူးပေါင်းအဖွဲ့သည် သက်သေများနှင့်အတူ ဝေါမြို့နယ်၊ ညောင်ခါးရှည်ကျေးရွာအနီးတွင် မော်တော်ယာဉ်များအား စစ်ဆေးရှာဖွေနေစဉ် မော်လမြိုင်မြို့ဘက်မှ ရန်ကုန်မြို့ဘက်သို့ မောင်းနှင်လာသော ခရီးသည်တင်ယာဉ်ကို ရပ်တန့်စစ်ဆေးရှာဖွေခဲ့သည်။
ယင်းဖြစ်စဉ်နှင့် ပတ်သတ်ပြီး စိုင်းလှ၀င်း(ခ)လှ၀င်း ကို ဝေါမြို့မရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အမှုဖွင့် အရေးယူထားရှိပြီး ကွင်းဆက်များ ဖော်ထုတ်လျက်ရှိကြောင်း သိရသည်။
