ကောင်းဝါ- ဇူလိုင် ၆၊၂၀၂၃။
ဘီးလင်းမြို့နယ်၊ နတ်ကြီး – ရှမ်းစုကျေးရွာအနီး နတ်ကြီး – ဘင်ဘန်းသွားကားလမ်းနံဘေးမှာ ဇူလိုင်လ (၅) ရက် ည (၇) နာရီအချိန်ခန့်က အမျိုးသားတစ်ဦး မြေမြှုပ်မိုင်းနင်းမိပြီး ထိခိုက်ဒဏ်ရာများ ရရှိခဲ့ကြောင်း ဒေသခံများ၏ ပြောကြားချက်များ အရ သိရသည်။
မြေမြှုပ်မိုင်းနင်းမိသူမှာ ဘီးလင်းမြို့နယ် နတ်ကြီးကျေးရွာ၊ ရှမ်းစုပိုင်းတွင်နေထိုင်သူ အသက် (၃၀) နှစ်အရွယ် ကိုဇော်ဝမ်း ဆိုသူဖြစ်ကြောင်း သိရသည်။
“ဇော်ဝမ်း အိမ်ကနေထွက်သွားပြီး မကြာဘူး ပေါက်ကွဲသံကြားလိုက်ရလို့ မိသားစုဝင်သွားကြည့်ကြတော့ ဇော်ဝမ်းက ဒဏ်ရာတွေနဲ့ လဲကျနေတာကို တွေ့ကြရတာပါ” ဟု ၎င်းဒေသခံက ဆက်လက်ပြောကြားသည်။
မြေမြှုပ်မိုင်းပေါက်ကွဲမှုကြောင့် ကိုဇော်ဝမ်းတွင် ယာဘက်ပါး ပေါက်ပြဲ၊ ယာဘက် လက်ကောက်ဝတ် ပေါက်ပြဲ၊ ယာဒူးခေါင်း ဖောက်ဝင်၊ ဝဲဒူးခေါင်းအောက် ဖောက်ဝင်၊ ယာဘက်ပေါင်ဖောက်ဝင်ဒဏ်ရာများ ရရှိခဲ့ပြီး အသက်အန္တရာယ်စိုးရိမ်ရသဖြင့် လူမှုကူညီကယ်ဆယ်ရေးအဖွဲ့က သထုံခရိုင် ပြည်သူ့ဆေးရုံကြီးသို့ ပို့ဆောင်ပေးထားကြောင်း သိရသည်။
