ရှမ်းပြည်နယ်ရှိ လူကုန်ကူးဂိုဏ်းလက်ထဲပိတ်မိနေသော အင်ဒိုနီးရှားနိုင်ငံသား ၁၄ ဦးကို ပြန်လည်ကယ်ထုတ်နိုင်ခဲ့

ကောင်းဝါ-ဇွန် ၂၇၊ ၂၀၂၃။

ရှမ်းပြည်နယ် လောက်ကိုင်မြို့ရှိ လူကုန်ကူးဂိုဏ်းများလက်ထဲတွင် ပိတ်မိနေသော ၄င်းတို့၏နိုင်ငံသား ၁၄ ဦးကို ပြီးခဲ့သောရက်ပိုင်းက အင်ဒိုနီးရှားအာဏာပိုင်များ ပြန်လည်ကယ်တင်ပေးနိုင်ခဲ့ကြောင်း သိရသည်။

မြန်မာနိုင်ငံရှိ လူကုန်ကူးဂိုဏ်း၏ အွန်လိုင်းမှတဆင့် အင်ဒိုနီးရှားနိုင်ငံသားများ လိမ်လည်ခေါ်ယူခံရပြီး အလုပ်လုပ်ရန် ပြောဆိုချိန်ကပြောခဲ့သော အလုပ်မျိုး မဟုတ်သည့် အလုပ်များကို လုပ်ကိုင်ခဲ့ရပြီး အဆိုပါ လူကုန်ကူးဂိုဏ်းများလက်ထဲတွင် ပိတ်မိနေခဲ့သည်ဟု ဆိုသည်။

မည်ကဲ့သို့ကယ်တင်ခဲ့သည်ကို ရှင်းလင်းပြောကြားခြင်းမရှိသော်လည်း အင်ဒိုနီးရှားစစ်တပ်မှ ဗိုလ်မှူးကြီး Arm Suhendro Oktosatrio က မြန်မာနိုင်ငံရှိ အင်ဒိုနီးရှားသံရုံးနှင့်ပူးပေါင်း၍ လောက်ကိုင်မြို့ရှိ လူကုန်ကူးဂိုဏ်းများလက်ထဲတွင် သားကောင်အဖြစ် ဖမ်းဆီးခံထားရသော အင်ဒိုနီးရှားနိုင်ငံသား ၁၄ ဦးကို အမြန်ဆုံးကယ်တင်နိုင်ခဲ့ပြီး မန္တလေးမြို့မှတဆင့် ရန်ကုန်မြို့သို့ ရောက်ရှိလာပြီဖြစ်ကြောင်း သိရသည်။

ယခုအခါ ၄င်းတို့ ၁၄ ဦးကို ရန်ကုန်မြို့ရှိ အင်ဒိုနီးရှားသံရုံးထံ ပြန်လည်ခေါ်ယူနိုင်ခဲ့ပြီး  အင်ဒိုနီးရှားနိုင်ငံသို့ ပြန်ပို့သွားမည်ဖြစ်ကြောင်း၊ အင်ဒိုနီးရှားသံရုံးသည် အင်ဒိုနီးရှားနိုင်ငံသားများကို မိခင်နိုင်ငံသို့ပြန်ပို့ရန်အတွက် လိုအပ်သောအရာများကို ဆက်လက်ဆောင်ရွက်လျက်ရှိသည်။

အင်ဒိုနီးရှားစစ်တပ်အနေဖြင့် အင်ဒိုနီးရှားနိုင်ငံသားများ သွေးထွက်သံယိုဖြစ်မှုများကို အချိန်အခါမရွေး ကာကွယ် ပေးသွားမည်ဖြစ်ကြောင်း အင်ဒိုနီးရှားစစ်ဘက်မှ ဗိုလ်မှူးကြီး Arm Suhendro Oktosatrio ပြောကြားခဲ့သည်။

ပြီးခဲ့သောလများမှာလည်း အင်ဒိုနီးရှားနိုင်ငံသား ၂၀ ဦးကို ထိုင်း-မြန်မာနယ်စပ်ဒေသရှိ မြဝတီမြို့နယ် လူကုန်ကူးဂိုဏ်းများလက်ထဲတွင် ပိတ်မိဖမ်းဆီးခံထားရခြင်းမှ ပြန်လည်ကယ်ထုတ်ကာ အင်ဒိုနီးရှားသံရုံးက ထိုင်းနိုင်ငံမှတဆင့် မိခင်နိုင်ငံသို့ ပြန်ပို့ဆောင်ခဲ့သေးကြောင်း ဂျာကာတာအခြေစိုက် AP သတင်းအရ သိရသည်။