ကောင်းဝါ ဇွန် ၂၆၊ ၂၀၂၃။
ရေးမြို့နယ်၊ ဒူးယားကျေးရွာအုပ်စု၊ မြို့ဟောင်းသုဿာန်တွင် ယနေ့မွန်းလွဲပိုင်းအချိန်က နာရေးပို့ဆောင်စဉ် ပစ်ခတ်မှုများဖြစ်ပွားခဲ့ရာ အမျိုးသားတစ်ဦး သေဆုံးပြီး၊ အမျိုးသမီးတစ်ဦး ကျည်ထိမှန် ဒဏ်ရာရရှိခဲ့ကြောင်း ဒေသခံများထံမှ သိရသည်။
ယနေ့ ဇွန်လ (၂၆) ရက် အဆိုပါ ပစ်ခတ်မှုအတွင်း သေဆုံးခဲ့သည့် အမျိုးသားမှာ မြို့ဟောင်းကုန်းရပ်နေ အသက် (၆၄) နှစ်အရွယ် ဦးစိုးအောင် ဆိုသူဖြစ်ပြီး၊ သေနတ်ဖြင့် ပစ်ခတ်ခံရသည့်အတွက် လည်ပင်းဝဲဘက်ကျည်ဖောက်ဝင်ဒဏ်ရာ (၁) ချက်၊ မေးစေ့ အောက်ကျည်ဖောက်ဝင်ဒဏ်ရာ (၁) ချက်၊ ဝဲ/ယာရင်အုံ ကျည်ဖောက်ထွက်ဒဏ်ရာ (၄) ချက်၊ ဝဲခါး ကျည်ဖောက်ဝင်ဒဏ်ရာ (၁) ချက်၊ ကျောကုန်းကျည်ဖောက်ဝင်ဒဏ်ရာ (၃) ချက်၊ ယာပေါင်ကျည်ဖောက် ဝင်ဒဏ်ရာ (၁) ချက်တို့ရရှိခဲ့ကာ အခင်းဖြစ်ရာ နေရာ၌ပင် သေဆုံးခဲ့ကြောင်း ဒေသခံတစ်ဦးက ပြောကြားသည်။
၎င်းကဆက်လက်ပြီး “နောက် သေနတ်ဒဏ်ရာရရှိခဲ့တဲ့ အမျိုးသမီးက အစင်ကျေးရွာ၊ ဓမင်းကုန်းရပ်မှာနေတဲ့ မဇင်မာနွယ် လို့ သိရတယ်။ သူမှာက ဝဲဘက်ဒူးကျည်ဖောက်ဝင်ဒဏ်ရာ (၁) ချက် နဲ့ ဝဲဘက် ပေါင်ကျည်ဖောက်ထွက် ဒဏ်ရာ (၁) ချက် ရရှိခဲ့ပါတယ်” ဟု ပြောသည်။
ပစ်ခတ်မှုအတွင်း သေဆုံးခဲ့သည့် ဦးစိုးအောင် ၏ ရုပ်အလောင်း နှင့် ကျည်ထိမှန်ဒဏ်ရာရရှိခဲ့သူ မဇင်မာနွယ် တို့အား လူမှုကူညီကယ်ဆယ်ရေးအဖွဲ့က ရေးခရိုင်ပြည်သူ့ဆေးရုံကြီးသို့ ပို့ဆောင်ပေးခဲ့ကြကြောင်း သိရသည်။
သေနတ်ဖြင့် ပစ်ခတ်ခံရသည့် ဦးစိုးအောင် အား ရေးဘီလူးအဖွဲ့မှ လုပ်ကြံသတ်ဖြတ်ခဲ့ကြောင်း ၎င်းတို့ အသုံးပြုသည့် လူမှုကွန်ရက်စာမျက်နှာပေါ် သတင်းထုတ်ပြန်ထားချက်အရ သိရသည်။
ပြီးခဲ့သည့် ဇွန်လ (၂၂) ရက် နံနက် (၁၀) နာရီအချိန်ခန့်ကလည်း ရေးမြို့နယ် လမိုင်းမြို့နေ ဒေါ်ခင်စန်းကြွယ် ဆိုသူ အမျိုးသမီးတစ်ဦးကိုလည်း ရေးဘီလူးအဖွဲ့က လုပ်ကြံသတ်ဖြတ်ခဲ့သေးကြောင်း သိရသည်။
